सुरेन्द्रकुमार कामती
सिरहा, १७ असार। सिरहा मधेस प्रदेशको उत्कृष्ट प्रादेशिक अस्पताल सिरहामा पूरानो ठूलो जेनेरेटरमा आगलागी भएको ८१ दिनमा नयाँ जेनेरेटर खरिद भएको छ।
गत चैत २९ मा आगलागी भएर ठूलो जेनेरेटर नष्ट हुँदा प्रादेशिक अस्पताल सिरहामा आइसियू, डायलासिस र एक्सरेलगायतका सेवा प्रभावित हुँदै आइरहेको थियो।
यस सम्बन्धमा नयाँ पत्रिकामा समाचार प्रकाशित गरेपछि मधेस प्रदेश सरकारले जेनेरेटर खरिद गर्न प्रादेशिक अस्पताल सिरहालाई ३० लाख रुपैयाँ निकासा गरेको थियो।
जेनेरेटर खरिद गर्न ३० लाख र जेनेरेटर राख्ने कोठा निर्माण गर्न प्रदेश सरकारले १० लाख गरी ४० लाख रुपैयाँ पठाएको प्रादेशिक अस्पताल सिरहाका सूचना अधिकारी अशोककुमार सिंहले बताएका छन्।
प्रदेश सरकारले रकम निकासा गरेपछि प्रादेशिक अस्पताल सिरहाले महिन्द्रा कम्पनीको पावररोल २०० केभिएको ५० हर्सपावरको जेनेरेटर खरिद गरेको सूचना अधिकारी सिंहले बताए।
खरिद गरिको जेनेरेटर शनिवार प्रादेशिक अस्पताल सिरहा आइपुगेको र जडानको काम सम्पन्न गरी आजदेखि विद्युत सुचारु गर्ने तयारी भईरहेको सूचना अधिकारी सिंहले बताए।
सदरमुकाम सिरहाको सडक विस्तारको क्रममा भएको तोडफोड, हावाहुरी, वर्षाका कारण प्रादेशिक अस्पताल सिरहामा नियमित रुपमा विद्युत आपूर्तिमा कठिनाई भइरहँदा डायलासिस लगायतका सेवा प्रभावित भईरहेको सिंहले बताए।
‘नयाँ जेनेरेटर आएसक्यो,’ सूचना अधिकारी सिंहले भने, ‘अब वैकल्पिक रुपमा विद्युत आपूर्तिकै कारण सेवा प्रवाहमा कुनै समस्या हुँदैन। हामीलाई चाहिने विद्युत नियमित हुनेगरी जेनेरेटर खरिद भइसक्यो।’
करिब २५ लाखको लागतमा जेनेरेटर खरिद भएको र पाँच लाखको लागतमा जेनेरेटर राख्ने भवन निर्माण भइरहेको सूचना अधिकारी सिंहले बताएका छन्।
जेनेरेटर नहुँदा र विद्युत प्राधिकरणले विना सूचना विद्युत कटौती गर्दा डायलासिस लगायतका सुविधा ठप्प हुँदै आइरहेको थियो। डायलासिस लगायतका सुविधा ठप्प हुँदा विभिन्न गाउँवाट डायलासिस गराउन आउने मृगौला रोगीहरु आन्दोलित हुनु परेको थियो।
नयाँ पत्रिकाबाट।
