संसद् भवनअगाडि आत्मदाह प्रयास गरेका आचार्यको उपचारको क्रममा निधन

काठमाडौं, ११, माघ। संघीय संसद् भवनअगाडि मंगलबार दिउँसो आत्मदाहको प्रयास गरेका प्रेमप्रसाद आचार्यको उपचारको क्रममा निधन भएको छ। कीर्तिपुरस्थित बर्न अस्पतालमा उपचारका क्रममा आज विहान उनको निधन भएको होे।

शरीरमा पेट्रोल हालेर आत्मदाह प्रयास गर्दा इलामको सूर्योदय नगरपालिका निवासी ३७ वर्षीय आचार्य गम्भीर घाइते भएका थिए। पेट्रोल खन्याएर आत्मदाह प्रयास गर्दा उनको शरीरको ८० प्रतिशत भाग जलेको र उपचारको क्रममा मृत्यु भएको अस्पतालका डा. किरण नकर्मीले जानकारी दिए।

घटनास्थलबाट तत्कालै कीर्तिपुरस्थित बर्न अस्पताल लगिएर उनको उपचार गरिएको थियो। मंगलबार साँझ स्वास्थ्य राज्यमन्त्री डा. तोसिमा कार्की अस्पताल पुगेकी थिइन्। राज्यमन्त्री कार्कीसँग प्रेमप्रसादले रवि सर र प्रचण्ड सरलाई भेट्न पठाइदिन अनुरोध गरेका थिए।