वीरगञ्ज, १८ बैशाख । जिल्ला प्रहरी कार्यालय पर्साले ३ जना मोटरसाइकल चोरलाई पक्राउ गरेको छ । मोटरसाइकल चोरी गरेर भाग्दै गरेको अवस्थामा वीरगञ्जबाट २ जना र पर्साको ठोरी गाउँपालिकाका १ जनालाई प्रहरीले पक्राउ गरेको हो ।
वीरगञ्ज महानगरपालिका वडा नम्बर ५ कुम्हाल टोल बस्ने ६२ वर्षीय हिमाल गौतमको ना.६४ प ९६०० नम्बरको कालो रंगको मोटरसाइकल शनिवार साँझ आफ्नै घर अगाडीबाट चोरी भएको सूचनाका आधारमा प्रहरीले खोजी शुरु गरेको हो ।
जिल्ला प्रहरी कार्यालयमातहतको अस्थायी प्रहरी पोष्ट शिवपार्वतीबाट खटिएको चेकिंग टोलीले वीरगञ्ज महानगरपालिका वडा नम्बर १० रानिघाट निवासी १८ वर्षीय कुन्दन साह र रौतहटको राजदेवी नगरपालिका वडा नम्बर ७ निवासी १८ वर्षीय रक्की भनिने राहुल सिँहलाई पक्राउ गरेको हो ।
यस्तै पर्साको ठोरी गाउँपालिका वडा नम्बर १ बस्ने ४० वर्षीय शिवशंकर मण्डलको बा.प्र. ०३ प ५३०४ नम्बरको रातो कालो रंगको सुपर स्प्लेण्डर मोटरसाइकल घर अगाडीबाट चोरी भएको थियो । बाइक चोरी भएको सूचनाको आधारमा ठोरी गाउँपालिका वडा नम्बर १ निवासी २५ वर्षीय निरज सुनुवारको घरमा त्रिपाल र प्लाष्टिकले लुकाईछिपाई राखिएको अवस्थामा फेला परेको इलाका प्रहरी कार्यालय ठोरीले जनाएको छ ।
सुनुवारसँगै पक्राउ परेका तिनै जनाविरुद्ध चोरी सम्बन्धी कसूरमा आवश्यक अनुसन्धान भइरहेको जिल्ला प्रहरी कार्यालय पर्साका प्रवक्ता एवम् प्रहरी नायब उपरीक्षक ओमप्रकाश खनालले जानकारी दिए ।
