वीरगञ्ज, १ वैशाख । पूर्वपश्चिम राजमार्ग अन्तर्गत बाराको जितपुरसिमरामा आज बिहान स्कार्पियो दुर्घटना हुँदा एक जनाको मृत्यु भएको छ । १३ जना घाइते भएका छन् ।
जीतपुरसमिरा उपमहानगरपालिका २१ आधारभार जंगलमा बा. १९ च ४३७७ नम्बरको स्कार्पियो दुर्घटना हुँदा चालक सोही उपमहानगरपालिका ११ का २५ वर्षीय लोकनाथ सेढाइको मृत्यु भएको हो।
दुर्घटनामा जीपमा सवार १३ जना घाइते भएका छन् । घाइतेमध्ये तीन जनाको अवस्था गम्भीर रहेको जिल्ला प्रहरी कार्यालय बाराका सूचना अधिकारी डीएसपी राजेश थापाले जानकारी दिए।
सिमराको अस्पतालमा सामान्य उपचारपछि घाइतेहरू सबैजनालाई वीरगञ्जस्थित बयोधा अस्पतालमा थप उपचारका लागि पठाइएको प्रहरीले जनाएको छ।
जीतपुरसिमरा ११ कै २२ वर्षीया उषा सेढाइ, २ वर्षीय अभय सेढाइ, ४ वर्षीया अंशु सेढाइ, ४० वर्षीया इच्छादेवी मिजार, ४८ वर्षीय जोगी मिजार, वीरगञ्ज ३२ का ५३ वर्षीया लालमुनिदेवी, १४ वर्षीया आशा साह, जितपुर ७ का ९ वर्षीय निखिल कुमार साह, ७ वर्षीय निवेश कुमार साह र एक जना पहिचान नखुलेको व्यक्ति घाइते भएका छन्।
घाइतेध्ये पर्साको बिन्दवासिनी २ का २२ वर्षीय प्रेम साह, १२ वर्षीय राजु गुप्ता, जीतपुरसिमरा ७ की २५ वर्षीया निर्मला देवी साह गम्भिर घाइते भएकी छिन्।
सिमराबाट हेटौंडा जाँदै गरेको स्कार्पियो आफैं अनियन्त्रित भइ सडकको बायाँतर्फ पल्टिएको थियो।
