काठमाडौं, ३ पुस । सरकारले भोलिदेखि देशका ५७ जिल्लाका किशोर-किशोरीलाई कोरोनाविरुद्धको मोडर्ना खोप दिइँदैछ।
बालबालिकालाई विद्यालयबाटै खोप दिने तयारी सरकारले गरेको हो। सम्बन्धित वडाले विद्यार्थीलाई पायक पर्ने गरी विद्यालयहरुमा खोप केन्द्र निर्धारण गर्नेछन्।
प्रदेश १ का ११, प्रदेश २ का पाँच, बागमतीका सात, गण्डकी, लुम्बिनी, कर्णालीका नौ नौ जिल्ला र सुदूरपश्चिम प्रदेशका सात जिल्ला गरी ५७ जिल्लाका सबै किशोर-किशोरीलाई मोडर्ना खोप दिन लागिएको हो।
त्यसैगरी प्रदेश २ को सिरहा, महोत्तरी, सर्लाही, रौतहट र बारा, बागमती प्रदेशको दोलखा, सिन्धुपाल्चोक, रसुवा, धादिङ, नुवाकोट, रामेछाप र मकवानपुर, गण्डकीका गोरखा, मनाङ, मुस्ताङ, म्याग्दी, लमजुङ, तनहुँ, नवलपरासी पूर्व, स्याङ्जा र पर्वत तथा लुम्बिनी प्रदेशको रुकुम पूर्व, रोल्पा, प्युठान, गुल्मी, अर्घाखाँची, पाल्पा, नवलपरासी पश्चिम, कपिलवस्तु र बर्दियामा पनि खोप कार्यक्रम सञ्चालन हुनेछ।
कर्णालीको डोल्पा, मुगु, हुम्ला, जुम्ला, कालीकोट, दैलेख, जाजरकोट, रुकुम पश्चिम र सल्यान तथा सुदूरपश्चिमको बाजुरा, बझाङ, दार्चुला, बैतडी, डोटी, अछाम र कञ्चनपुरका किशोर-किशोरीलाई पनि मोर्डना खोप दिन लागिएको मन्त्रालयले जनाएको छ।
बाँकी २० जिल्लामा भने फाइजर खोप लगाउने मन्त्रालयले जनाएको छ। –नेपालखवरबाट
