सिरहा, २ पुस । सिरहाको लहानमा सडक दुर्घटनामा परि एकै परिवारका तीन जनाको मृत्यु भएको छ । एक जना घाइते भएको छ । लहान ३ मा प्रदेश २–०१–००२प २६८२ नम्बरको मोटरसाइकललाई स १ क २६२ नम्बरको टिपरले ठक्कर दिंदा सप्तरीको बलान बिहुल गाउँपालिका २ दिघियाका ६५ वर्षीय मोतीलाल यादव, उनका भतिजा ३० वर्षीय रामकुमार यादव र ७ वर्षीय नाती अभिषेकको विहिवार अपरान्ह मृत्यु भएको हो ।
लहान–ठाडी सडक खण्डमा उत्तरबाट दक्षिणतर्फ जाँदै गरेको टिपरले विपरित दिशाबाट आईरहेको मोटरसाइकललाई ठक्कर दिएको इलाका प्रहरी कार्यालय लहानका प्रमुख डीएसपी डा. तपन दाहालले जानकारी दिए । उनीहरु चारैजना एउटै मोटरसाइकलमा सवार थिए ।
उनका अनुसार तीन जनाको मृत्यु भएको र १ जना बच्चा घाइते भएका छन् । एकै परिवारका तीन जनाको मृत्यु भएपछि गाउँ नै शोकमा डुबेको वडा अध्यक्ष बिरेन्द्र गोइतले बताए । उनले भने, ‘अहिले उनको परिवारमा रुवाबासी चलेको छ । गाउँ शोकमा डुबेका छन् ।’
मृतकको तीनै जनाको शव पोष्टमार्टमका लागि लहानमै राखिएको छ ।
