सर्लाही, १ पुस । सर्लाहीका् फरक–फरक ठाउँमा आगोले जलेर एकै घरका दुई बालिकासहित तीन जनाको मृत्यु भएको छ । एक जना घाइते भएका छन् । कबिलासी नगरपालिका ७ सिरसियाका जोगी महराको फुसको घरमा विद्युत सर्ट भई आगलागी हुँदा उनकी ८ वर्षीया छोरी लक्ष्मी कुमारी र ३ वर्षीया छोरी सोगन्धी कुमारीको मृत्यु भएको हो ।
जलेर घाइते भएका उनीहरुलाई जिल्ला अस्पताल मलंगवामा प्राथमिक उपचारपछि थप उपचारका लागि काठमाडौं पठाउने क्रममा बाटोमै मृत्यु सर्लाही प्रहरीका सूचना अधिकारी डीएसपी माधव प्रसाद बुढाथोकीले जानकारी दिए ।
आगलागीमा जलेकी उनकै पाँच वर्षीया छोरी सुधा कुमारी स्थानीय मेडिकलमा उपचार पछि घर फर्केको प्रहरीले जनाएको छ ।
आगलागीकै कारण सर्लाहीकै मलंगवा नगरपालिका ६ खुटौना बस्ने ७० वर्षीय नसिर खाँको मृत्यु भएको छ । आगो ताप्ने क्रममा उनले लगाएको कपडामा आगो सल्किएको थियो । त्यसपछि नालीमा खसेर छटपटाइरहेको अवस्थामा प्रहरीले उद्धार गरी उनलाई उपचारका लागि जिल्ला अस्पताल मलंगवा पठाइएको थियो । उनको उपचारकै क्रममा मृत्यु भएको प्रहरीले जनाएको छ ।
