गमक पोष्ट समाचारदाता / काठमाडौं, १४ जेष्ठ । सरकारले छिमेकी भारत सहित चार मुलुकका लागि नियमित उडान खुला गरेको छ । बिहीबार बसेको मन्त्रिपरिषद् बैठकले दुई छिमेकी मुलुक भारत र चीनसहित कतार र टर्कीमा सेड्युल उडान हुने निर्णय गरेको हो । यसमध्ये अहिले भारतमा भने साताको दुई उडान भइरहेको छ । चीन, कतार र टर्कीमा भने १८ जेठबाट नियमित उडान खुल्ने संस्कृति, पर्यटन तथा नागरिक उड्डयन मन्त्री भानुभक्त ढकालले जानकारी दिए । उनका अनुसार यात्रुको बढी चाप हुने मुलुकमा उडान खोल्ने निर्णय मन्त्रिपरिषद्ले गरिएको हो । यी गन्तब्यमा आएका मानिसको साथमा पीसीआर नेगेटिभ भएको रिर्पोट भने हुनुपर्नेछ । खोपको मात्रा पुरा गरेका यात्रु होम आइसोलेसनमा बस्न सक्नेछन् । अन्य यात्रुको हकमा भने अनिवार्य होटेल क्वारेन्टिनको व्यवस्था गरिएको छ । कोरोना भाइरसको महामारी नियन्त्रण गर्न घोषित निषेधाज्ञाका बीच पछिल्लो एक महिनादेखि नेपालमा आन्तरिक तथा बाहृय दुबै हवाई उडान बन्द छ ।
