गमक पोष्ट समाचारदाता
बर्दिवास, १४ फागनु । घरबाटै चार अघि बेपत्ता झा दम्पती अझै फेला परेका छैनन् । सोमबारदेखि वेपत्ता महोत्तरी पिपरा गाउँपालिका–५ सहोडाको ६५ वर्षीय मोसाफिर झा र उनकी पत्नी ६० वर्षीया गीतादेवी अझै फोला पर्न नसकेको हो ।
आफ्नै घरमा सुतिरहेका अवस्थामा अज्ञात समूहले बेपत्ता पारेका उनीहरुको व्यापक खोजतलास भईरहेको जिल्ला प्रहरी कार्यालय महोत्तरीका प्रहरी प्रवक्ता प्रहरी नायब उपरीक्षक प्रकाश विष्टले जानकारी दिए ।
उनीहरु बूढाबूढी मात्रै घरमा सुतिरहेका अवस्थामा बेपत्ता पारिएको जनाइएको छ । उनीहरुको ओछयान र ढडोकाको चौकस रगतका छिट्टा देखिनुले घटना रहस्यमय भएको भन्दै प्रहरीले मङ्गलबार बिहानैदेखि व्यापकरुपमा खोजतलास गरिहेको जनाएको छ । प्रहरीले गाउँको चारैतिरको वन चौर, झाडी, खोलानाला र छिमेकी गाउँ तथा जिल्लाको विभिन्न स्थानमा समेत व्यापकरुपमा खोजी गरिसकेको तथा अहिलेसम्म कुनै सुराक फेला नपरेको बताएको छ ।
वृद्ध दम्पती एउटा मोही जग्गासम्बन्धी मुद्दामा साक्षी गवाही रहेको कारण उनीहरुको हत्या गरी शव बेपत्ता पारिएको हुन सक्ने स्थानीय बासिन्दाले आशङ्का गरेका छन् । उनीहरुको अवस्थाबारे अनुसन्धानका लागि अहिलेसम्म २० जनाभन्दा बढीसँग आवश्यक सोधपुछ गरिसकिएको प्रहरीको भनाइ छ ।
