गमक पोष्ट समाचारदाता
सिरहा, १८ पुस । नेपाल कम्युनिष्ट पार्टी (नेकपा) दहाल–नेपाल समूका स्थायी समिति सदस्य एवम् पूर्व शिक्षा मन्त्री गिरिराजमणी पोखरेलले जनताको अपार मतलाई लात हान्दै के.पी.ओलीले संघीयता नै धरापमा पर्ने गरी असंवैधानिके कदम विरुद्ध आ–आफ्नो ठाउँबाट आन्दोलन उत्रिनुको विकल्प नरहेको बताएको छ ।
सिरहाको धनगढीमाई नगरपालिकाले शनिवार आयोजना गरेको नगरस्तरीय अगुवा कार्यकर्ताहरुको भेलामा सम्बोधन गर्दै नेता पोखरेलले संसद् विघटन गर्नु अगाडि अहिलेको संविधानमा थुप्रै चरण हुँदाहुँदै पनि संसद विघटन गर्नु घोर असंवैधानिक कदम भएकोले आन्दोलनको विकल्प नरहेको बताएका हुन् ।
उनँले के.पी.ओलीले गरेको असंवैधानिक कदमको विरुद्ध अन्य राजनीतिक दल, नागरिक समाज, बुद्धिजीवी सबै एकै ठाउँमा रहेकोले आन्दोलनकै भरमा संसद् पुनस्र्थापना हुने दावी समेत गरे ।
नेपाल कम्युनिष्ट पार्टीका केन्द्रीय सदस्य एवम् धनगढीमाई नगरपालिकाका नगरप्रमुख हरिनारायण चौधरीले के.पी.ओलीको असंवैधानिक कदमको विरुद्धको आन्दोलनसँगै प्रदेश नं. २ ले आउँदो २५ गते सिरहाको कर्जन्हामा किसान नेता जयगोविन्द साहको स्मृति भव्य रुपले मनाउने निर्णय भएकोले स्मृति सभामा भाग लिन समेत सबैमा अपिल गरे ।
आयोजित कार्यक्रममा नगरप्रमुख चौधरीले उत्तरवहादुर मगरको नेतृत्वमा दुई सय ५१ जना नगरस्तरीय जनपरिचालन समिति प्रस्ताव गरे । उक्त प्रस्तावलाई ध्वनी मतले पारित गरेको छ ।
पारित भएको दुई सय एकाउन्न जनपरिचालन समितिमा १४ वटा वडा रहेको धनगढीमाई नगरपालिकामा प्रत्येक वडामा १५ जना सदस्य चयन हुनेछ । अन्य सदस्यहरुमा जिल्ला कमिटीका सदस्य, जनवर्गीय संगठन सदस्य, नागरिक समाजको समेत सहभागिता रहने गरी छनोट हुने आयोजकले जनाएको छ ।
उत्तरवर्ती अति रमणीय स्थल धनगढीमाई नगरपालिकाको १३ दुर्विन डाँडामा संचालित कार्यक्रममा केन्द्रीय सदस्य, प्रदेश सभा सदस्य, जिल्ला सदस्य एवम् नगरपालिकाका अगुवा नेता कार्यकर्ताहरुको उल्लेख्य सहभागिता रहेको थियो ।
