गमक पोष्ट समाचारदाता
जनकपुर २५ कात्तिक । जनता समाजवादी पार्टी, नेपालका राष्ट्रीय अध्यक्ष उपेन्द्र यादवले वर्तमान सरकार संघीयता र गणतन्त्र समाप्त पार्ने षडयन्त्र खेलमा लागेको रहेको आरोप लगाए । पार्टीको युवा संघद्वारा मंगलबार जनकपुरमा आयोजीत पार्टी प्रवेश कार्यक्रमलाई सम्वोधन गर्दै अध्यक्ष यादवले नेपालको संविधानले अपरवर्तनीय रुपमा राखेको संघीय लोकतान्त्रिक गणतन्त्रलाई संघिय सरकारले चुनौैती दिदै संघियता समाप्त पार्ने आरोप लगाएकोे हो ।
मुलुक कोरोना महामारीको संकट झेली रहेको समयमा सरकारको मुख्य कर्तव्य जनताको ज्यानको सुरक्षा हुनु पर्ने सरकार त्यस बाट विमुख भई अन्य चलखेलमा लाग्नु मुलुकको लागी दुर्भाग्य रहेको बताए ।
जनताको जिउ धनको सुरक्षा गर्न नसक्ने सरकारको आवश्यकता नरहेको उल्लेख बताउँदै उनले आफ्नो पार्टी सरकार विरुद्धका सबै मोर्चामा लडने जनाए ।
आन्दोलनबाट प्राप्त उपलब्धीहरुको रक्षा गर्दै विभेद रहित समृद्ध मुलुकको निर्माणका लागि वैकल्पिक शक्तिको रुपमा जसपाको गठन भएको बताउँदै अध्यक्ष यादवले शिक्षित र सक्षम युृवाहरुले नेतृत्व गर्ने समय आइ सकेको बताए ।
विश्वको हरेक परिवर्तनको नेतृत्व युवाहरुले नै गरेको उल्लेख गर्दैै अध्यक्ष यादवले मुलुकको विकास र समृद्धिको लागि शिक्षित र सक्षम युवाहरुले पहलकदमी लिन आग्रह समेत गरे ।
समाजवादी युवा संघका जिल्ला अध्यक्ष दिपेन्द्र कापडीको अध्यक्षतामा भएको उक्त कार्यक्रममा युवाका संघका केन्द्रिय अध्यक्ष योगेन्द्र राय यादव, जनकपुर उपमहानगरका प्रमुख लालकिशोर साह, बौद्धिक पेशाकर्मी महासंघका केन्द्रिय उपाध्यक्ष जितेन्द्र कुमार यादव सहितका वक्ताहरुले सम्बोधन गर्नु भएको थियो ।
कार्यक्रममा विभिन्न पार्टी परित्याग गरेको करिब तीन सय युवाहरुलाई प्रमुख अतिथी यादवले पार्टीमा स्वागत गरे ।
