जनकपुरधाम, १३ कात्तिक। मधेस प्रदेशमा नयाँ सरकार गठनका लागि जनता समाजवादी पार्टी (जसपा) नेपाल, नेकपा (एमाले र जनमत पार्टीबिच छलफल अघि बढेको छ।
नेपाली कांग्रेस संसदीय दलका नेता कृष्णप्रसाद यादव नेतृत्वको सरकारलाई एमालेले दिएको समर्थन फिर्ता लिएपछि तीन दल नयाँ सरकार गठनको तयारीमा जुटेका हुन्। यादव नेतृत्वको सरकारबाट एमाले समर्थनफिर्तासहित गत असोज २५ गते बाहिरीएका थिए।
जनमत पार्टीका नेता तथा प्रदेशसभा सदस्य महेशप्रसाद यादवका अनुसार तीन दलबीच नयाँ सरकार गठनका विषयमा छलफल भइरहेको छ।
यद्यपि, सरकारको नेतृत्व कसले गर्ने भन्ने विषयमा भने ठोस सहमति भइ नसकेको उनले बताए। एमाले संसदीय दलका नेता सरोजकुमार यादवले जसपा र जनमत पार्टीका नेताहरूसँग नयाँ सरकार गठनका विषयमा संवाद भइरहेको र चाडपर्व सकिएपछि निष्कर्षमा पुग्ने जानकारी दिए। नयाँ राजनीतिक समीकरणमा नयाँ सरकारको नेतृत्वमा भने तीनवटै दलबाट दाबी हुँदै आएको छ।
प्रदेशसभामा सबैभन्दा ठूलो दल जसपाले सरकारको नेतृत्व आफूले पाउनुपर्ने दाबी गर्दै आएको छ। उक्त पार्टी संसदीय दलका नेता सरोजकुमार यादवले तीनवटै दलका अध्यक्षबीच केन्द्रबाटै प्रदेश सरकारको नेतृत्वका विषयमा सहमति जुटाउने समझदारी भएको बताए।
एक सय सात सदस्यीय मधेस प्रदेशसभामा सरकार गठन गर्न कम्तीमा ५४ प्रदेशसभा सदस्यको समर्थन आवश्यक पर्नेछ। अहिले जसपाको २७, नेपाली कांग्रेसको २२, एमालेका २३, नेपाली कम्युनिष्ट पार्टीका १५ र जनमत पार्टीका १२ जना सांसद रहेका छन्। त्यस्तै, सङ्घीय समाजवादी पार्टी र राष्ट्रिय प्रजातन्त्र पार्टीका एक–एक सदस्य रहेका छन्।
