मुकेश कुमार यादव
सिरहा ११ माघ। सिरहाको गोलबजार नगरपालिकाका शिक्षा शाखाले बेतलवी बिदामा अस्ट्रेलिया गएकी एकजना शिक्षीकाको प्रधानाध्यापकसंगको आर्थिक बार्गेनिङमा तलब निकासा गरेको खुलेको छ। गोलबजार ४ स्थित श्री जनता माध्यमिक विद्यालय प्राविधिक गोलबजारमा बेतलवी असाधारण बिदामा बसेकी शिक्षिका बिमला झाको ३ लाख तलब निकासा गरेको तथ्य बहिरिएको हो।
बिधालयका प्रधानाध्यापक भरत साह र नगर शिक्षा शाखाका अधिकृत सुवोध लामाले करिव ६ महिनादेखी अस्ट्रेलिया गएकी शिक्षिका झाको अर्को हाजिरी रजिस्ट्रर खडागरी हाजिरी प्रमाणीत गरेर ५० प्रतिशत रकम हत्याउनकै लागि तलब निकासा गरिएको नाम उल्लेख नगर्ने शर्तमा एकजना शिक्षकले बताए। उनले भने, ‘शिक्षा शाखाका प्रमुख र प्रधानाध्यापकले रकमको बार्गेनिङ गरेरै झाको तलब निकासा गरिएको थियो। बिस्तारै कुरा बाहिरिएपछी पहिला हाजिर गर्ने रजिस्ट्ररमा गयल लेखेर निकासा गरिएको तलब कोलनिकामा गएर जम्मा गरेको हो।´
शिक्षिका बिमला झा गत २०८१ जेठ १० गते देखि विद्यालयमा अनुपस्थित छिन् । शिक्षिका झाले बेतलवी असाधारण बिदाका लागि निवेदन दिएकी थिइन् । उनको बिदा स्वीकृतिको लागि विद्यालयबाट वडा कार्यालयको सिफारिससहित नगरपालिकाको शिक्षा शाखामा पठाइयो । शिक्षा अधिकृत लामाले पनि सिफारिससहित उनको फाइल जिल्ला शिक्षा समन्वय इकाई सिरहामा पठाइ दिए । तर बिदा स्वीकृति भएन ।
बिदा स्वीकृति नभए पनि शिक्षिका झा छोरीको अतिथि बनेर अष्ट्रेलिया गइन् । उनी अहिलेसम्म फर्केकी छैनन् । तर प्रधानाध्यापक भरत साहले उनको हाजिरी प्रमाणित गरेर नगर शिक्षा शाखामा पठाए । नगरपालिकाले २०८१ असोजसम्मको तलब निकासा दियो । प्रधानाध्यापक साहले विद्यालयबाट झाको तलब २ लाख ९६ हजार ३ सय ४५ रुपैयाँ ६३ पैसा निकासा लिए । प्रधानाध्यापक साह र शाखा प्रमुख लामाले रकम कुम्ल्याउनकै लागि नयाँ रजिस्ट्रर खडा गरि हाजिरी रजिष्टरमा आफैले हा. हा. लेखेर हाजिरी गरिदिएका छन् ।
शिक्षिका झाको तलब निकासा लिएर हिनामिना गरेको भन्दै विद्यालयका एक शिक्षकले अख्तियार दुरुपयोग अनुसन्धान आयोगमा निवेदन दिएपछि घटना बाहिरिएको हो ।
आयोगको कार्यालय बर्दिवासले प्रधानाध्यापक साहलाई बोलाएर स्पष्टीकरण लिएको छ । अख्तियारले फाइल मागेपछि अत्तालिएका प्रधानाध्यापकले हाजिरी रजिष्टरमा टिपेक्स लगाएर हाजिरी मेटाएका छन् र गयल जनाइदिएका छन् । तर उनले अपराध लुकाउन गरेको प्रयासले उनलाई झन् उदाङ्गो पारिदिएको छ ।
यस सन्दर्भमा प्रधानाध्यापक साहसँग जिज्ञासा राख्दा उनले भने शिक्षिका झा अष्ट्रेलिया गएकी हुन् र उनको बिदा समेत स्वीकृत भएको छैन । तलब किन र कसरी निकासा भयो त भन्दा प्रअ साहले यस विषयमा भेटेरै कुरा गर्छु भनेर फोन काटेका थिए ।
यता शिक्षा शाखा प्रमुख सुवोध लामासंग यश बिषयमा जिज्ञासा राख्दा लामाले भने झुक्किएर तलब गयो होला , फिर्ता गराउने प्रकृया थालिएको छ ।
संविधान सभा सदस्य तथा पूर्व प्रदेश सांसद जगत यादब भन्छन् यस प्रकरणमा हेडमास्टर र शिक्षा अधिकृतको मिलिभगत देखिन्छ । बिमला झाको बेतलवी बिदा स्वीकृति गरिदिन शिक्षा अधिकृत सुवोध लामाले आफैले सिफारिस गरेका थिए । त्यही शिक्षिकाको हाजिरी प्रमाणित र तलब निकासाको माग आउँदा शिक्षा अधिकृत लामाले कसरी र किन रुजु गरे ? किन तलब निकासा दिए ? यसमा झाको तलब झिकेर प्रधानाध्यापक र शिक्षा अधिकृतले बाँडेर खाने प्रपञ्च रचेको प्रष्ट देखिन्छ ।´
यस विषयमा गोलबजार नगरपालिकाका प्रमुख प्रशासकीय अधिकृत हरिलाल पुरीको प्रतिक्रिया माग्दा उनले भने म फाइल अध्ययन गर्दैछु । दोषी जो भए पनि कारवाही गर्छु । उनले शिक्षा अधिकृत लामाको संलग्नता देखिए उनलाई पनि कारवाहीको दायरामा ल्याउने बताए।
गोलबजार नगरपालिकाको शिक्षा शाखा भ्रष्टाचारको अड्डा बनेको स्थानीयहरु बताउँछन् । शिक्षा शाखा प्रमुख शुबोध लामाले शिक्षक सरुवा, शिक्षक भर्ना , दिवा खाजामा हुने निकासा लगायतको शैक्षिक कार्यक्रमहरुमा समेत बिना बर्गेनिङ कुनैपनी फाइल अगाडी नबढाउने गरेको स्थानीयहरुको भनाई छ।
