बर्दिवास, १३ कात्तिक। महोत्तरीको पिपरामा हत्या गरेको अवस्थामा एक अपरिचित युवतीको शव फेला परेको छ। भारतसँग सीमा जोडिएको पिपरा गाउँपालिका ७, दनौलीमा अनुहार जलाइएको अवस्थामा करिव २५ वर्षीया युवतीको शव फेला परेको हो।
‘अनुहार जलेको अवस्थामा सोमबार दिउँसै शव फेला परेपनि अहिलेसम्म सनाखत हुन नसकेको जिल्ला प्रहरी कार्यालय महोत्तरीका सूचना अधिकारी डीएसपी सन्तुलाल जैसवालले जानकारी दिए।
उनका अनुसार पिपरा ७ दनौली चौरीमा स्थानीय अशोक ठाकुरको आँप बगैँचामा अनुहार जलेको अवस्थामा शव देखेपछि स्थानीयले प्रहरीलाई खबर गरेका थिए।
घटनास्थल भारतीय सीमा क्षेत्रबाट झण्डै पाँच किमी नजिक पर्छ।
‘कालो लेहँगा र हल्का पहेँलो रङको कुर्था लगाएकी युवतीको शव आँप बगैँचाको आलीमा भेटिएको हो,’ जैसवालले भने, ‘अनुहारमाथि सल राखेर जलाइएको छ। तर, शरीरको अन्य भागमा भने कुनै चोटपटक देखिएको छैन। अनुहार पनि पूरै जलेको छैन। हामीले पोस्टमार्टमका लागि शव प्रादेशिक अस्पताल जलेश्वरमा राखेका छौँ।’
युवतीको हत्या भएको आशंका प्रहरीले गरेको छ। प्रहरीले घटनाको सुक्ष्म अनुसन्धानमा जुटेको जनाकारी दिए।
