सिराहा, ८ असोज। सिरहामा आफ्नै बुवा हत्या गरेको अभियोगमा एक युवक पक्राउ परेका छन्। जिल्लाको औरही गाउँपालिका ३ खजनपुरका ६५ वर्षीय भालेश्वर यादवलाई कुटपिट गरी हत्या गरेको अभियोगमा उनकै छोरा ३८ वर्षीय शैलेन्द्र कुमार यादवलाई सोमबार बेलुकी प्रहरीले पक्राउ गरेको हो।
शैलेन्द्र र उनकी श्रीमती ३५ वर्षीया रेणु कुमारी यादवले घरायसी विवादको क्रममा कुटपिट गर्दा घाइते भालेश्वरको प्रादेशिक अस्पताल सिरहामा आवश्यक उपचार पछि थप उपचारको लागि नोबेल अस्पताल बिराटनगरतर्फ लैजाने क्रममा बाटोमै मृत्यु भएको जिल्ला प्रहरी कार्यालय सिरहाका सूचना अधिकारी डीएसपी मुक्तिनाथ सापकोटाले जानकारी दिए।
गाउँमा आपसी विवादका क्रममा घाइते भएको खबर प्राप्त हुनासाथ प्रहरी चौकी औरहीबाट खटिएको प्रहरीले शैलेन्द्रलाई नियन्त्रणमा लिएको प्रहरीको भनाई छ।
यस सम्बन्धमा प्रहरीले आवश्यक अनुसन्धान गरिरहेको जनाएको छ।
