पर्साको नेपाल भारत सीमा नजिकै गाडिएको अवस्थामा दुईवटा शव भेटीयो

वीरगन्ज, २९ जेठ। पर्साको भारतीय सीमाक्षेत्र जगरनाथपुरमा गाडिएको अवस्थामा दुईवटा शव भेटिएको छ। जगरनाथपुर गाउँपालिका १ विसनपुरुवाबाट भारतको नगरदाहतर्फ जाने बाटोको ओरिया खोला नजिकै नेपाल भारत सीमा दशगजाको ४२१र५ नम्बरको सीमास्तम्भ नजिकै दुईवटा शव गाडिएको अवस्थामा फेला परेको हो।

सशस्त्र प्रहरी र भारतीय सीमा सुरक्षा बल एसएसबीको संयुक्त गस्ती टोलीले गस्ती गर्ने क्रममा शव गाडेको स्थानमा देखेका दिए। स्यालले खोतलेको देखेपछि नजीकै गएर हेर्दा शव देखिएको जिल्ला प्रहरी कार्यालय पर्साले बताएको छ।

घटनाको जानकारी पाएपछि इलाका प्रहरी कार्यालय पटेर्वा सुगौलीबाट पुगेका प्रहरी टोलीले शव खनेर निकालेको छ। निकालिएको शव अन्दाजी ३५ बर्षको युवाको रहेको प्रहरीको भनाई छ।

अर्को शव भने खन्न बाँकी रहेको छ। जिल्ला प्रहरी कार्यालय पर्साबाट पनि अनुसन्धान अधिकृतहरुको टोली सहित घटनास्थलमा गईरहेको र पुगेपछि गाडिएको अवस्थामा रहेको शव निकाल्ने इलाका प्रहरी कार्यालय पटेर्वा सुगौलीका प्रहरी निरीक्षक मोहनजंग बुढा थापाले बताए।