विशाल बस्नेत
महोत्तरी, ७ चैत। महोत्तरीमा सार्वजनिक जग्गा हडप्ने, व्यक्तिका जग्गाहरू आफ्नो नाममा ल्याएर घरबारविहीन बनाउने र वनसमेत अतिक्रमण गरि आफ्नो नाममा बनाएका घटनाहरु सार्वजनिक हुँदै आएका बेला बर्दिवासका एक व्यक्तिले विद्यालयको जग्गा नै अतिक्रमण गरेर आफ्नो बनाउने प्रयास गरेको खुलेको छ।
बर्दिवास ७ स्थित जनहित नन्दलाल माध्यामिक विद्यालयको १ बिघा ५ कठ्ठा ४ धुर जग्गामा लगाइएको करिव ६ सय रुख कटान गरि जग्गा कब्जा गर्ने प्रयास गरेको खुलासा भएको हो।
गाउँकै बृज विहारी महतोले विद्यालयले लगाएको भिक्स जातका रुखहरु कटान गरी बेचबिखनसमेत गरेको स्थानीय बताउँछन्। १८ इन्चदेखि ४२ इन्चसम्मको रुख कटान गरि मिथिला नगरपालिकाका एक फर्निचर व्यवसायीलाई बिक्री गरेको फेला परेको छ।
रातारात विद्यालयको नाममा रहेको उक्त जमिनका रुखहरु कटान गरेर बिक्री गरेपछि स्थानीय आक्रोशित भएका छन्। विद्यालय व्यवस्थापन समितिका अध्यक्ष बिदुर कार्कीले विद्यालयको जग्गा थाहा हुँदाहुँदै रुखहरु कटान गर्नु गलत भएको बताए।
‘जसले गल्ती गरेको भए पनि सजायको भागिदार हुनुपर्छ; उनले भने, ‘अत्यन्तै खेदपूर्ण घटना घटेको छ।’
ती व्यक्ति शक्तिको आडमा परिचालित भएको कतिपयको आरोप छ। वडा नम्वर ६ का वडा अध्यक्ष पदम आलेमगरले नगरले यस्ता ब्यक्तिहरुलाई संरक्षित गरि अराजक मच्चाउन खोजेको बताए।
वडा नम्वर ७ का वडा अध्यक्ष भोरिल यादवले विद्यालयको जग्गा जानाजान अतिक्रमण गर्नु गम्भीर अपराध भएको बताउँदै दोषीलाई थप छानबिन गरि कारबाही प्रक्रियाअगाडि बताउने बताए।
यता स्थानीयहरुले भने मनोबल उच्च बनाएर सार्वजनिक जग्गा अतिक्रमण गर्नेलाई हदैसम्मको कारबाही हुनुपर्ने अडान लिएका छन्। यदी दोषीलाई तत्काल कारबाही नभए संघर्षका कार्यक्रमसमेत तय गर्ने स्थानीयहरुले चेतावनी दिएका छन् । अभिभावक संघकी सदस्य जुनु यादवलले कारबाहीमा बेवास्ता गरेमा दबाबमुलक कार्यक्रमसमेत सिर्जना गर्ने बताइन्।
‘आवश्यक परे हामी लोकतान्त्रिक अधिकारको प्रयोग गरि सडक संघर्षसमेत गर्छौं; उनले भनिन्, ‘अपराध गर्नेहरुले उन्मुक्ति पाउन हुँदैन।’
तर, रुख कटान गरि रातारात बेचेको आरोप लागेको आरोपित वृज विहारी महतोले उक्त जग्गा आफ्नै भएको दाबी गरेका छन्। बर्षौदेखि आफैले जोतभोग गरेको उक्त जग्गामा अहिलेसम्म विद्यालयले दावी नगरेको बताउँदै बाँकी रुखहरु पनि काटेर देखाउने चुनौती दिएका छ्न्।
स्थानीयहरुले लगाएको आरोप निराधार भएको बताउँदै उक्त जग्गा विद्यालयको भए सजाय भोग्न तयार भएको उनको भनाई छ।
