जनकपुरधाम २३ पुस। राष्ट्रिय सभा सदस्य निर्वाचनका लागि मधेश प्रदेशबाट विभिन्न पार्टीका पाँच जनाले उम्मेदवारी दर्ता गराएका छन्। मधेश प्रदेशमा रिक्त अन्य र महिला गरी दुई सिटका लागि नेपाली काँग्रेस, जनमत पार्टी, जनता समाजवादी पार्टीबाट एक–एक जना र नेकपा एमालेबाट दुई र सहित पाँचजनाले उम्मेदवारी दिएका हुन्।
निर्वाचन आयोगले सोमबार दिउँसो ३ बजेसम्म उम्मेदवारी दर्ताका लागि समय तोकेको थियो।
सोही समयमा नेपाली कांग्रेसबाट अन्यमा आनन्दप्रसाद ढुङ्गना, जनमत पार्टीबाट रामाशंकर महासेठ, नेकपा (एमाले)बाट अन्यमा कुमारी विजेता झा, महिलामा उषादेवी थरुनी र जनता समाजवादी पार्टी (जसपा)बाट महिलामा पूजा चौधरीले उम्मेदवारी दर्ता गराएको प्रादेशिक निर्वाचन कार्यालय मधेश प्रदेशका सूचना अधिकारी कृष्ण राउतले जानकारी दिए।
मधेश प्रदेशबाट रिक्त अन्य र महिला गरी दुई सिटमा आगामी माघ ११ गते राष्ट्रिय सभा सदस्यका लागि निर्वाचन हुँदैछ।
