सिरहा, ८ पुस। वन कार्यालयले सिरहाको कर्जन्हा नगरपालिका १ बल्टियाको वन क्षेत्रमा पर्ने कमला नदी किनारबाट एउटा एक्साभेटरसहित दुई जनालाई नियन्त्रणमा लिइएको छ।
प्रारम्भिक वातावरणीय परीक्षण नगरी वन क्षेत्रमा पर्ने कमला नदी किनारबाट उत्खनन् गरिरहेको अवस्थामा एक थान एक्साभेटरसहित चालक प्रदिपकुमार दर्लामी र स्थानीय ठेकेदार निरज बस्नेतलाई नियन्त्रणमा लिइएको हो।
डिभिजन वन कार्यालय लहान, सिरहाका प्रमुख सुजितकुमार झाका अनुसार कर्जन्हाको बन्दीपुरस्थित सवडिभिजन वन कार्यालयको गस्ती टोलीले खन्दै गरेको अवस्थामा एक्साभेटरसहित दुई जनालाई नियन्त्रणमा लिइएको जानकारी दिए।
उनले नियन्त्रणमा लिइएकाहरुलाई डिभिजन वन कार्यालय लहान सिरहाको हिरासतमा राखेर थप अनुसन्धान थालेका बताए।
स्थानीय जनप्रतिनिधीकै मिलेमत्तोमा उत्खनन हुनेगरेको स्थानीयहरुको आरोप छ। उनीहरुले दिनदहाडै ठूला उपकरण प्रयोग गरेर उत्खनन गर्दा समेत जनप्रतिनिधीले देखेको नदेख्यै गर्नुले पनि उनीहरुको सलङ्गता देखिने स्थानीयकोभनाई रहेको छ।
