महोत्तरी, २६ मंसिर। एमाले सांसद लक्ष्मी महतो कोइरी जोडिएको ज्यान मुद्दामा भोलि पनि निरन्तर सुनुवाइ हुने भएको छ।
सशस्त्र प्रहरीका सहायक निरीक्षक (असई)थमन विकको हत्यासम्बन्धी मुद्दामा जिल्ला अदालत महोत्तरीमा बुधबार तेस्रो दिन पनि सुनुवाइ निरन्तर हुने भएको हो।
न्यायाधीश उद्ववप्रसाद भट्टराईको इजलासमा सोमबारदेखि यस मुद्दाको सुनुवाइ चलिरहेको छ। मंगलबारसम्म सरकारी वकिलको बहस सकिएको र प्रतिवादीका कानुन व्यवसायीले भोलि निरन्तर बहस गर्ने महोत्तरी अदालतकी श्रेस्तेदार नूतन झाले नेपालखबरलाई जानकारी दिइन्।
२०७२ भदौ २५ गते मधेश आन्दोलनका क्रममा घाइते भएका सशस्त्र प्रहरीका असई विकलाई उपचारका लागि जलेश्वरबाट जनकपुर अस्पताल लैजाँदै गर्दा एम्बुलेन्सबाट झारेर हत्या गरिएको थियो।
हत्यामा तत्कालीन मधेशवादी दलका नेता (हाल एमालेका निलम्बित सांसद) लक्ष्मी महतो कोइरीको पनि संलग्नता रहेको भन्दै मुद्दा दायर भएको थियो।
प्रहरीको फरार सूचीमा रहेका कोइरी २०७९ मंसिर ४ गते भएको प्रतिनिधि सभा निर्वाचनमा महोत्तरी-१ बाट निर्वाचित भएका थिए।
उनले वारेसमार्फत् प्रतिनिधि सभा सदस्यको उम्मेदवारी दर्ता गराएका थिए भने चुनाव जितेपछि प्रमाणपत्र पनि वारेसमार्फत् नै बुझेका थिए।
निर्वाचनपछि महोत्तरीका सार्वजनिक कार्यक्रममा नदेखिएका कोइरी संसद भवन नयाँ बानेश्वरमा सपथ ग्रहण कार्यक्रममा सहभागी भएका थिए। त्यसपछि संसदका केही बैठकमा उपस्थित भए पनि प्रहरीले पक्राउ गर्ने तयारी गरेपछि फेरि फरार भएका हुन्।
