नापी कार्यालय लहानका अमिन यादवविरुद्ध विशेष अदालतमा भ्रष्टाचार मुद्दा

सिरहा, २ असोज। नापी कार्यालय लाहानमा कार्यरत अमिन (करार) दीपरन्जन यादवविरुद्ध भ्रष्टाचार मुद्दा दायर भएको छ।

अख्तियार दुरुपयोग अनुसन्धान आयोगले जग्गाधनी पुर्जा बनाउन सहजिकरण गरिदिने भन्दै सेवाग्राहीसँग १० हजार घुस लिइसकेको अवस्थामा पक्राउ परेका यादव विरुद्ध आज विशेष अदालतमा आरोपपत्र दायर गरेको हो।

सेवाग्राहीसँग घुस माग गरेको भन्ने सूचना एवम् उजुरी निवेलनका आधारमा अख्तियार दुरुपयोग अनुसन्धान आयोगको कार्यालय बर्दिवासबाट खटिइ गएको टोलीले यादवलाई गत भदौ ६ नियन्त्रणमा लिएको थियो।

अख्तियारका प्रवक्ता भोला दाहालले यादवले सेवाग्राहीसँग घुस लिई भ्रष्टाचार निवारण एने अन्तर्गत कसुर गरेको पुष्टि भएको जानकारी दिए।

उनका अनुसार बिगो १० हजार कायम गरी भ्रष्टाचार निवारण ऐन २०५९ को दफा ३ को उपदफा १ को देहाय (क) बमोजिम कैद सजाय गरी सोही एनेको दफा ३ को उपदफा १ अनुसार बिगो बमोजिम जरिवानाको सजाय हुन मागदाबी लिइ विशेष अदालतमा आरोपपत्र दायर गरेको हो।