वीरगञ्ज, ११ जेठ। बाराको श्रीगढीमाई बहुमुखी क्याम्पसलाई दाताहरुले ५६ लाख बराबरको १४ कठ्ठा जग्गा दान गरेका छन्। केही समयअघि क्याम्पसको आयोजनामा श्रीमद् भागवत तथा गढीमाई महोत्सवका अवसरमा विभिन्न व्यक्तिले क्याम्पसलाई जग्गा दान गर्ने प्रतिबद्धता बमोजिम उनीहरुले क्याम्पसलाई जग्गा दान गरेका हुन्।
क्याम्पसलाई महागढीमाई नगरपालिका १ का नागेन्द्रप्रसाद चौधरीले १० कठ्ठा तथा पन्नालाल प्रसाद, प्रेम प्रसाद, सुमित्रा देवी र नरेशप्रसाद जयसवालले एक–एक कठ्ठा जग्गा दान गरेको क्याम्पस सञ्चालक समितिले जानकारी दिए।
पाँचै जनाले बुधबार मालपोत कार्यालयमा गई जग्गा क्याम्पसको नाममा पास गरी लालपुर्जा क्याम्पस सञ्चालक समितिका अध्यक्ष विजयकुमार स्वर्णकार र क्याम्पस प्रमुख धर्मेन्द्रप्रसाद यादवलाई हस्तान्तरण गरे। यसैगरी क्याम्पसले महायज्ञबाट सङ्कलन भएको रकमबाट चार लाख रुपैयाँका दरले थप चार कठ्ठा जग्गा खरिद गरेको अध्यक्ष स्वर्णकारले जानकारी दिए।
जमिन प्राप्तिपछि क्याम्पसले आगामी दिनमा अझ व्यवस्थित पर्वाधार र पठन पाठनमा सहजहुने स्थानीयको विश्वास रहेको छ।
