साङ्केतिक फोटो।
वीरगञ्ज, ६ जेठ। चालु आर्थिक वर्ष २०७९र०८० को १० महिनामा पर्साका सरकारी कार्यालयको पूँजीगत खर्च निराशाजनक देखिएको छ। कोष तथा लेखा नियन्त्रण कार्यालय वीरगञ्जका अनुसार १० महिनाको अवधिमा पर्सास्थित ४२ सरकारी कार्यालय तथा पालिकाको पूँजीगत खर्च ३५ प्रतिशत रहेको छ।
यहाँका ४२ सरकारी कार्यालयले कूल बजेटको पूँजीगततर्फ ३५ प्रतिशत र चालुतर्फ ८१ प्रतिशतमात्र खर्च गरेका कोष तथा लेखा नियन्त्रण कार्यालयका प्रमुख यज्ञराज उप्रेतीले जानकारी दिए उनका अनुसार पूँजीगततर्फ चार अर्ब ४७ करोड २६ लाख ४२ हजार चार सय ३८ रुपैयाँमध्ये वैशाख मसान्तसम्म एक अर्ब ५५ करोड २२ लाख १६ हजार १८ मात्र खर्च भएको छ। चालुतर्फ १० अर्ब ३७ करोड ९३ लाख आठ हजार नौ सय ५७ रुपैयाँमध्ये वैशाख मसान्तसम्म आठ अर्ब ४६ करोड ११ लाख एक हजार नौ सय १२ खर्च भएको छ।
वीरगञ्ज महानगरपालिकासहित जिल्लाका १४ वटै पालिकाको समानीकरण र शसर्त बजेट पाँच अर्ब ४२ करोड ३५ लाख ८० हजार रुपैयाँमध्ये वैशाख मसान्तसम्म सबै पालिकाको पहिलो र दोस्रो त्रैमासिकमा गरी दुई अर्ब २६ करोड ५० लाख २२ हजार दुई सय रुपैयाँ निकासा भएको कार्यालयले जनाएको छ।
समयमा ठेक्का सम्झौता नहुनु, आर्थिक तरलताका कारण निर्माण कम्पनीले समयमा काम सम्पन्न गर्न नसक्नुलगायत कारणले सरकारी कार्यालयको पूँजीगत खर्च र विकास बजेट खर्च कम भएको हुनसक्ने प्रमुख उप्रेतीको भनाइ छ।
