काठमाडौं, २ जेठ। नेपाल आयल निगमले डिजेल र मट्टितेलको मूल्य प्रति लिटर १० रुपैयाँले घटाएको छ। इन्डियन आयल कर्पोरेशन (आइओसी) बाट पेट्रोलियम पदार्थको खरिद मूल्य घटेर आएपछि निगमले डिजेल र मट्टितेलको मूल्य घटाएको हो।
निगमले डिजेल र मट्टितेलको मूल्यमा आज राति १२ बजेदेखि लागू हुने गरी प्रतिलिटर १० रुपैयाँ घटाएको छ। पेट्रोल, खाना पकाउने ग्यास र हवाई इन्धनको मूल्य यथावत छ। मूल्य घटेसँगै डिजेल र मट्टितेलको खुद्रा बिक्री मूल्य प्रतिलिटर एक सय ५५ रुपैयाँ कायम भएको छ।
यस अघि डिजेल र मट्टितेलको खुद्रा बिक्री मूल्य प्रतिलिटर एक सय ६५ रुपयाँ थियो। पेट्रोलको मूल्य प्रतिलिटर एक सय ७५, हवाई इन्धन (आन्तरिक) को मूल्य प्रतिलिटर एक सय ६०, हवाई इन्धन (बाह्य) को प्रतिलिटर अमेरिकी डलर १.३५० र खाना पकाउने ग्यासको मूल्य प्रतिसिलिण्डर एक हजार आठ सय कायमै रहेको छ।
