सिरहाका किरात राईले मनाए साकेला उभौली

सिरहा ३१ बैशाख। सिरहामा बसोबास गर्ने किरात राई समुदायले शनिबार गोलबजार नगरपालिका ४ मा विभिन्न झाँकी सहितको सास्कृतिक कार्यक्रम गरेर साकेला उभौली पर्व मनाएका छन्।

किरात राई यायोक्खा नगरकमिटी गोलबजारको आयोजनामा बुद्ध पूर्णिमापछिको दोस्रो शनिबार परम्परागत जातीय भेषभूषा लगाएर र बाजागाजा सहित साकेला नाचेर आपसमा खुशियाली साटासाट गरेका हुन्।

साकेला उभौली पर्वको अवसरमा गोलबजार नगरपालिकाका मेयर श्याम कुमार श्रेष्ठले शुभकामना व्यक्त गरे। उनले सवै जात जाती भाषा भाषीको विकासको लागि पालिकाको तर्फबाट गर्न सकिने सवैखालको सहयोग गर्ने प्रतिबद्धता जनाए।

सोही अवसरमा किरात राई यायोक्खाका केन्द्रिय सदस्य तथा जिल्ला इन्चार्ज अन्जनी राईले पर्वको शुभकामना दिँदै आफ्नो जातिय पहिचानको लागि सवै एकजुट हुनुपर्नेमा जोड दिए।

कार्यक्रममा विभिन्न जातिय संगठनका अगुवाहरुको उपस्थिति रहेको थियो। उनीहरुले सवैजात समुदायको पहिलो पहिचान भाषा भएको बताउँदै भाषा संरक्षणमा राज्यले पहलकदमी लिनुपर्ने बताए। कम्तीमा प्राथमिक तहका विद्यालयहरुमा स्थानीय भाषा पढाउने व्यवस्था मिलाउनु पर्नेमा जोड दिए।

साकेला उभौली २०८० को अवसरमा जिल्लाका विभिन्न स्थानबाट किरात राई समुदाय जम्मा भएर आपसमा खुशियाली साटेका थिए।

कार्यक्रम किरात राई यायोक्खा गोलबजारका अध्यक्ष मधुकुमार राईको अध्यक्षतामा सम्पन्न भएको छ।