म्याद गुज्रिएका ९५ लाख बराबरकोे सामग्री बरामद, ३ जना प्रहरीको नियन्त्रणमा

सूर्य वि.क.

वीरगञ्ज, १४ चैत। म्याद सकिएको सामग्री पुनः नयाँ प्याकिङ् गरी बिक्रि गर्ने ३ जनालाई पर्सा प्रहरीले नियन्त्रणमा लिएको छ। वीरगञ्ज महानगरपालिका १३ श्रीपुरस्थित एक उद्योगमा छापामारी प्रहरीले सोही ठाउँका ३२ बर्षिय मनिष कुमार चौधरी, वीरगञ्ज ७ का २३ बर्षिय आयुष अग्रवाल र वीरगञ्ज १४ का ३८ बर्षिय हरिनारायण प्रसाद कुर्मीलाई नियन्त्रणमा लिएको हो।

श्रवण रुंगटाको घरमा संचालीत उद्योगमा म्याद सकेको सामग्रीहरु पुनः नयाँ प्याकिङ हुने गरेको विशेष सूचनाको आधारमा प्रहरीले छापामारी गरेको पर्साका प्रहरी नायब उपरीक्षक दिपक गिरीले जानकारी दिए।

गिरीका अनुसार जिल्ला प्रहरी कार्यालय पर्सा, जिल्ला प्रशासन कार्यालय पर्सा, बाणिज्य आपुर्ति तथा उपभोक्ता संरक्षण कार्यालय वीरगञ्ज, खाद्य प्रविधी तथा गुण नियन्त्रण कार्यालय वीरगञ्ज र वीरगञ्ज उद्योग वाणिज्य संघको संयुक्त टोलीले छापा मारेको हो। छापामारीका क्रममा एउटै घरमा स्नेक एण्ड प्याक उद्योग र फुडको नेपाल क्रोप प्रा.लि. संचालन रहेको पाइएको वाणिज्य आपुर्ती तथा उपभोक्ता संरक्षण कार्यालय वीरगञ्जका सूचना अधिकारी दिपक खंग खत्वेले जानकारी दिए।

उनका अनुसार विना होर्डिङ बोर्डको एउटै घरमा गोप्य तरिकाले संचालन रहेको उद्योग र कम्पनीमा म्याद सकेको खाद्य सामग्रीहरु पुनः नयाँ प्याकिङ गरी बजारमा बिक्री गर्ने गरेको फेला परेको हो। म्याद सकिएको करिव ९५ लाख बराबरको खाद्य सामग्रीहरु पनि बरामद गरिएको छ।

उद्योगमा छापामारी भएको थाहा पाए लगतै संचालकहरु फरार भएको हुँदा उनीहरुको खोजी भइरहेको प्रहरीले जनाएको छ।

वीरगञ्ज ७ निवासी संजय अग्रवाल, सोही ठाउँका विद्या कुमारी सरावगी र भरतपुर ३ चितवन निवासी सन्तोष कुमार अग्रवालले सो घरमा उद्योग र कम्पनी संचालन गर्दै आएका छन्।