साङ्केतिक फोटो।
सिरिहा, २२ फागुन। आज फागु पूर्णिमा पहाडी र हिमाली क्षेत्रमा होली पर्व उल्लासका साथ मनाइँदै छ। असत्यमाथि सत्यको विजयको प्रतीक, पारिवारिक एवम् सामाजिक एकताको पर्वका रुपमा फागु पर्व मनाउने प्रचलन छ। फागु पर्वमा एक आपसमा विभिन्न रङ्ग तथा अबिर लगाएर मनाउने चलन छ।
फागु पर्वको अवसरमा राष्ट्रपति, प्रधानमन्त्रीका साथै राजनीतिक दलका शीर्ष नेताहरुले शुभकामना गरेका छन्। पर्वले विद्यमान विभिन्न प्रकारका विकृति, विसङ्गति एवम् कुरीतिहरुलाई निर्मूल गर्दै मौलिक संस्कृतिहरुको संरक्षण र संवर्द्धन गर्न प्रेरणा प्रदान गर्ने शुभकामना सन्देशमा भनिएको छ। होली पर्वका अवसरमा पहाडि जिल्लाहरुमा आज सार्वजनिक बिदा दिइएको छ। यसैबीच, प्रहरीले होली सभ्य तरिकाले मनाउन अनुरोध गरेको छ।
होहल्ला नगरि, जाँडरक्सी तथा लागुपदार्थ नखाइ एकआपसमा रमाएर होली मनाउन प्रहरीले अनुरोध गरेको हो। अभद्र तरिकाले होली खेलिएको पाइए कारबाही हुनेछ। यस्तै, कसैले इच्छा विपरीत रङ लगाए, लोला हाने वा फोहर पानी र विभिन्न केमिकल मिसिएको पदार्थ लगाइदिए तुरुन्त प्रहरीको १०० नम्बरमा फोन गरेर जानकारी दिन आग्रह गरिएको छ।
