वीरगञ्जमा खुल्यो बनारसी पान पसल, ३० रुपैयाँदेखि पाँच हजारसम्को पान पाइने

वीरगञ्ज, ९ फागुन। वीरगञ्जमा मस्त बनारसी पान पसल सञ्चालनमा आएको छ। वीरगञ्जको रानीघाटमा विगत साढे ४ दशकभन्दा लामो समयदेखि स्वर्गीय शम्भु प्रसाद रौनियारले सञ्चालन गर्दै आएको पान पसललाई नै छोरा जय र बिजयले परिस्कृत ढंगले सञ्चालन गरेका हुन्।

गीता मन्दिर रोडमा घडिअर्वा पोखरीको अगाडी सञ्चालनमा आएको मस्त बनारसी पान पसलको सोमवार उद्घाटन गरिएको छ । जय र बिजय दाजुभाईले सञ्चालनमा ल्याएको पसलको उनकी आमा मुन्नी देवी रौनियारले रिबन काटेर उद्घाटन गरेकी हुन्।

शतप्रतिशत धुम्रपानरहित पान पाइने उक्त पसल भारतमा प्रख्यात मस्त मनारसी पान पसलको फ्रान्चाइज हो। भारतको दिल्लीसहित भारतभरी २ सय भन्दा बढी र नेपालको काठमाण्डौमासमेत शाखा रहेको पान पसल वीरगञ्जमा पनि खुलेको हो।

१० लाख रुपैयाँको लगानीमा सञ्चालनमा आएको पान पसलमा विभिन्न किसिमका २ सय भन्दा बढी स्वादका पानहरु उपलब्ध हुने मस्त बनारसी पानका प्रबन्ध निर्देशक बिजय रौनियार बताउँछन्। उनका अनुसार न्युनतम ३० रुपैयाँदेखि अधिकतम ५ हजार १ सय रुपैयाँसम्मका पानहरु पसलमा पाइन्छन्। बिजय पेशाले सफ्टवेयर इन्जिनियर हुन्। भारतको राजधानी दिल्लीको नोइडास्थित कोर भ्यालु कम्पनीमा सफ्टवेयर इन्जिनियरको रुपमा कार्यरत बिजयले बुबाले नै सञ्चालन गर्दै आएको व्यवसायलाई परिवर्तीत र परिस्कृत ढंगले सञ्चालन गर्ने योजना बनाएका थिए।

दाई जय रौनियारसँगको समन्वय र सहकार्यमा पूरानै पेशालाई नयाँ ढंगले सञ्चालन गर्न थालेको बिजयले बताए। विवाह, वर्तबन्ध लगायतका विभिन्न किसिमका कार्यहरुमा पनि पान उपलब्ध गराउन सकिने मस्त बनारसी पानका सञ्चालक जय रौनियारले जानकारी दिए।