सप्तरी, ४ मंसिर। प्रतिनिधि तथा प्रदेश सभाका लागि आइतवार शान्तिपूर्ण रुपमा मतदान सम्पन्न भएको छ। जिल्ला निर्वाचन कार्यालयका अनुसार ६१ प्रतिशतभन्दा वढी मत खसेको छ।
कुल ४ लाख १८ हजार ३ सय ७४ मतदाता रहेको जिल्लामा करिव २ लाख ५५ हजार २ सय ८ मतदान भएको निर्वाचन कार्यालयको प्रारम्भिक अनुमान छ।
यद्यपि रुजु गर्ने काम भइरहेकाले यकिन सख्या सोमवार मात्र भन्न सकिने जिल्ला निर्वाचन अधिकारी रमेशकुमार जोशीले जानकारी दिए। जिल्लाको छिन्नमस्ता र रुपनी गाउँपालिकामा मतदानस्थल वाहिर दुई दलका समर्थकबीच कुटपिटको घटना वाहेक निर्वाचन शान्तिपुर्ण रुपमा सम्पन्न भएको छ।
गत स्थानीय तहको निर्वाचनमा जिल्लामा ६३ प्रतिशत मत खसेको थियो । ससंदीय निर्वाचनमा सो प्रतिशत पुग्न नसकेकाले स्थानीय तहजस्तो उत्साह नदेखिएको निर्वाचनमा खटिएका कर्मचारी र पर्यवेक्षकले बताए।
जिल्लामा ४ प्रतिनिधिसभा र ८ प्रदेशसभा सदस्यका लागि मतदान भएको हो। जिल्ला निर्वाचन अधिकारी जोशीले मतपेटीका समबन्धित मुख्य निर्वाचन अधिकूत, निर्वाचन अधिकृतको कार्यालयमा ल्याउने काम भइरहेको बताए। जिल्लामा तोकिएको ५ सय ३६ मतदान केन्द्रमा विहान ७ वजेदेखि अपरान्ह ५ वजेसम्म मतदान भएको थियो।
मतपेटिका संकलन भइसकेपछि आवश्यक प्रक्रिया पूरागरी सोमबार विहान ८ वजेदेखि मतगणना शुरु गर्ने तयारी रहेको बताइएको छ । मतपेटिका राखिएको ठाउँमा अहिले निगरानी कडा पारिएको छ।
