वीरगञ्ज, २१ कात्तिक। बारा प्रहरीले प्रतिवन्धित लागु औषध गाजा सहित एक जनालाई पक्राउ गरेको छ। प्रहरीले निजगढ नगरपालिका १२ बारथलीका ५८ वर्षीय प्रेमबहादुर लोलाई २५ किलो लागु औषध गाजा सहित पक्राउ गरिएको हो।
आइतबार राति इलाका प्रहरी कार्यालय निजगढ, बाराबाट खटिएको प्रहरी टोलीले निजगढ १२ कुलियाबाट उनलाई पक्राउ गरेको जिल्ला प्रहरी कार्यालय बाराले जनाएको छ । प्रहरी टोलीलाई देख्ने वित्तिकै उनी सहित ३ जनाले बोकेर ल्याएको बोरा फालेर भागेका थिए।
२ वटा बोरामा ७ किलोका दरले १४ किलो र एउटा बोरामा ११ किलो गरी जम्मा २५ किलो लागु औषध गाजा बरामद भएको जिल्ला प्रहरी कार्यालय बाराका सूचना अधिकारी डीएसपी राजेश थापाले जानकारी दिए।
प्रेम विरुद्ध लागु औषध मुद्धामा बारा जिल्ला अदालतबाट म्याद थप गरी फरार रहेका २ जनाको खोजी भइरहेको बारा प्रहरीले जनाएको छ।
