बारा, २६ असोज। बाराको प्रसौनी गाँउपालिका ५ प्रस्टोकास्थित खोलाको किनारमा आमा र दुई छोराछोरीको हत्या गरी फालिएको अवस्थमा शव भेटिएको छ। प्रस्टोका गाँउभन्दा करिब २ किलोमिटर टाढाको ढोरा खोला किनारमा बुधबार दिउँसो साढे २ बजेतिर प्रस्टोका टोलकै दीपेन्द्र चौधरीकी पत्नी २५ वर्षीया सुजता चौधरी, उनकी ३ वर्षीया छोरी ताहिरा चौधरी र १६ महिनाका छोरा राजवीर चौधरीको शव भेटिएको हो।
तीनै जनाको विभत्स तरिकाले हत्या गरी शव फालिएको अवस्थामा भेटिएको बाराका प्रहरी प्रमुख एसपी होविन्द्र बोगटीले जानकारी दिए।
घरमुली दीपेन्द्रले पत्नी सुजाता र दुई छोराछोरीको हत्या गरेको स्थानीयको आशंका छ। पत्नी र छोराछोरीको हत्या गरि फरार भएका दिपेन्द्रलाई प्रहरीले घाइते अवस्थामा फेला पारी उपचारका लागि अस्पतालमा भर्ना गरेको छ। पत्नी र छोराछोरीको हत्या गरी भाग्ने क्रममा दीपेन्द्र लडेर घाइते भएको हुनसक्ने आशंका छ। उनको प्रहरी निगरानीमा उपचार भइरहेको बोगटीले जानकारी दिए।
बुधबार अपरान्ह घटनास्थलमा पुगेका प्रहरी उपरीक्षक बोगटीले हत्या कसले र किन गरेको भन्ने विषयमा अझै एकीन कारण खुल्न नसकेको र यसबारे अनुसन्धान भइरहेको बताए।
