पेस्तोलको गोली र लागुऔषधसहित दुई युवक पक्राउ

लहान, २८ भाद्र। सिरहा प्रहरीले लागुऔषध र पेस्तोलमा लाग्ने गोली सहित दुई युवकलाई पक्राउ गरेका छन्। जिल्लाको सखुवानन्कारकट्टी गाउँपालिकाको महेशबारी चोकबाट प्रहरीले प्रतिवन्धित लागुऔषध एक सय एमएलको एक बोतल डाइलेक्स डिसी, एक थान नौ एमएमको पेस्तोलको गोली, २८ थान नाइट्राभेट, ३८ थान स्पास्मो प्रोक्सिभोनसहित उदयपुरको त्रियुगा नगरपालिका ४ का ४१ वर्षीय ध्रुव बुढाथोकी र सिराहाको लक्ष्मीपुरपतारी गाउँपालिका ५ घर भई लहान नगरपालिका ५ बस्ने २५ वर्षीय अब्दुल मरासिकीलाई पक्राउ गरेका हुन्।

पक्राउ गरिएका बुढाथोकी र मरासिकीलाई लागुऔषध, खरखजाना मुद्दामा सिराहा जिल्ला अदालतबाट अनुसन्धानका लागि पाँच दिनको म्याद लिइएको सिराहा प्रहरीका सूचना अधिकारी डीएसपी सुवास बुढाथोकीले जानकारी दिए।

सखुवानान्कारकट्टी गाउँपालिका–५ महेशबारी चोकमा इलाका प्रहरी कार्यालय महेशबारीबाट खटिएको गस्ती टोलीले चेकजाँच गर्दा स ११ प ५७२७ नम्बरको मोटरसाइकल चढेका बुढाथोकी र मरासिकीको साथबाट प्रतिबन्धित लागुऔषध र पेस्तोलको गोली बरामद गरेको हो। नगद नौ हजार रुपैयाँ र तीन थान चेक, दुई थान मोबाइल, तीन थान बिलबुक, एक थान स्कारपियोको साँचोलगायतका सामग्री बरामद भएको प्रहरीले जनाएको छ। उनीहरूमाथि लहानस्थित इलाका प्रहरी कार्यालयमा थप अनुसन्धान भइरहेको छ।