जनकपुर, १५ भाद्र। धनुषा प्रहरीले मानव बेचविखन आरोपमा तीन जनालाई पक्राउ गरेका छन्। दुईजना बालिकाहरुलाई भारतको दिल्ली तर्फ बेच्न लग्दै गरेको आरोपमा जनकपुरधाम उपमहानगरपालिका ७ कमलानगरका २६ वर्षीय रुपेशकुमार मिश्र, वडा नम्बर २३ का २३ वर्षीय दिलमहम्द साह र महोत्तरीको मटिहानी नगरपालिका २ का २० वर्षीया रानी भनिने मुस्कान मण्डल लाई फक्राउ गरेका हुन्।
जनकपुरधामबाट जयनगरतर्फ जाँदै गरेको नेपाली रेलमा बालिकालाई चढाएर लग्दै गरेकोअवस्थामा इनर्वा स्टेशनबाट ती बालिकाको उद्धार गरिएको र तीन जनालाई पक्राउ गरिएको जिल्ला प्रहरी कार्यालय धनुषा सूचना अधिकारी डीएसपी प्रदीपबहादुर क्षेत्रीले जानकारी दिए।
ती बालिकालाई भारतको दिल्लीतर्फ बेच्न लगिरहेको सूचनाको आधारमा बालिकाको उद्धार गरी उनीहरुलाई पक्राउ गरिएको क्षेत्रीले बताए।
पक्राउ परेकाबिरुद्ध मानव बेचबिखन तथा ओसारपसार मुद्दामा म्याद थप गरी थप अनुसन्धान गरिरहेको प्रहरीले जनाएको छ।
