जनकपुर, १५ साउन। मुख्यमन्त्री लालबाबु राउतले मिटरव्याजी विरूद्ध कडा कदम चाल्ने बताएका छन्। मिटर व्याज विरूद्ध संघर्ष समितिको ज्ञापन पत्र बुझदै मुख्यमन्त्री राउतले मिटरव्याजीहरू बाट पीडितहरूको पक्षमा प्रदेश सरकार गम्भीर रहेको उल्लेख गर्नु उनिहरू विरूद्ध कडा कदम चाल्ने बताएका हुन्।
मिटर व्याज सरकारको लागि ठुलो चुनौती बन्दै गएको बताउँदै मुख्यमन्त्री राउतले समाजको विकृतिको रूपमा रहेका मिटरव्याजीहरूलाई कानूनको दायरामा ल्याउन प्रदेश सरकार प्रतिबद्ध रहेको बताए।
उनले भने, ‘हामी तपाईहरूको समस्या प्रति गम्भीर छौं। प्रहरी प्रशासन प्रदेश मातहत नहुदाँ ठोस कदम चाल्न सकिएको छैन। सम्बन्धित ठाँउहरूमा आवाज उठाउदै आएको छु। चाँडै समस्या समाधानको बाटो पहिल्याइन्छ, ढुक्क हुनुस्।’
संघर्ष समितिका संयोजक मनोज कुमार पासमान नेतृत्वमा मुख्यमन्त्री निवास मधेशभवन पुगेका पीडितहरूले ७ बुन्दे माँग सहितको ज्ञापन पत्र मुख्यमन्त्री राउतलाई बुझाएका छन्।
संघर्ष समितिले मिटर व्याजीलाई कार्वाही, पीडितको जफत सम्पति फिर्ता, मिटर व्याजीको सम्पनी छानविन, तमसुक व्यवस्था खारेज, सहुलितयत दरमा ऋणको व्यवस्था, मिटर व्याजीबाट ऋणीहरुमाथि हुने गरेको यौन शोषणको छानवित लगायतका माँग ज्ञापन पत्रमा उल्लेख गरेको छ।
संघर्ष समितिले प्रदेश सरकारले पीडितहरुको पक्षमा भुमिका निर्वाहगरी अभिभावकको भूमिका निर्वाह गर्न अनुरोध गरेको छ।
