जनकपुर, १० जेष्ठ । धनुषाका १८ वटै पालिकाका प्रमुखहरुले आज मंगलबार एकै पटक शपथ ग्रहण गरेका छन् । जनकपुरमा एक समारोहकाबीच सबै जिल्लाका १ उपमहानगरपालिका, ११ नगरपालिका र ६ गाउँपालिका प्रमुखले एकैपटक शपथ ग्रहण गरेका हुन्।
सबै पालिका प्रमुखलाई मुख्य निर्वाचन अधिकृत ब्रजेश प्याकुरेलले शपथ ग्रहण गराएका छन्। उक्त समारोहलाई सम्बोधन गर्दै मुख्य निर्वाचन अधिकृत प्याकुरेलले राजनीतिक नेतृत्वभन्दा माथि उठेर सबैलाई समान व्यबहार गर्न पालिका प्रमुखसँग आग्रह गरे।
जनताको अपेक्षालाई पूरा गर्ने जिम्मेबारी पालिका प्रमुखसहित जनप्रतिनिधीको भएको भन्दै उनले चुनाव लडदा गरिएको भन्दा बढी परिश्रम अब गर्नुपर्ने समय आएको बताए।
धनुषाका प्रमुख जिल्ला अधिकारी सुरेन्द्र पौडेलले चुनाव अघिसम्म बिभिन्न दलबीच प्रतिस्पर्धा भएपनि अब सबैको जनप्रतिनिधी बनेकाले सोही अनुसारको यबहार गर्नुपर्ने बताए।
उनले भोट हाल्नेको पनि नहाल्नेको पनि प्रतिनिधित्व गर्दै शिक्षा, स्वास्थ्यलाई मजबुत बनाउन आग्रह गरे।
