छिटफुटबाहेक पर्सामा शान्तपुर्ण मतदान सम्पन्न, जिल्लामा ७० प्रतिशत मत खसेको अनुमान

वीरगञ्ज, ३० बैशाख । पर्सा जिल्लामा छिटफुटबाहेक शान्तपुर्ण वातावरणमा मतदान सम्पन्न भएको छ । १ सय ६७ मतदानस्थलमा निर्धारण गरिएका ४ सय ४ मतदान केन्द्रमा मतदान सम्पन्न भएको हो । वीरगञ्ज महानगरपालिका वडा नम्बर २८ बगही, पर्साको छिपहरमाई गाउँपालिका वडा नम्बर १ मिर्जापुर लगायतका केही मतदान केन्द्रमा केही बेर तनाब भएपनि अधिकांश स्थानमा शान्तिपुर्ण ढंगबाट मतदान सम्पन्न भएको पर्साका प्रमुख प्रहरी उपरीक्षक रमेशकुमार बस्नेतले बताए ।

जिल्लाका १४ वटै स्थानीय तहमा रहेका ३ लाख २९ हजार ८ सय ३६ मतदातामध्ये ७० प्रतिशत मत खसेको मुख्य निर्वाचन अधिकृत धर्मराज पौडेलको अनुमान छ । उनले भने, यकिन तथ्यांक आउन बाँकी नै छ तर औसतमा ७० प्रतिशतको हाराहारीमा मत खसेको अनुमान गरेका छौँ ।’ वीरगञ्ज महानगरपालिकाभित्र ७५ प्रतिशतको हाराहारीमा मत खसेको सहायक प्रमुख निर्वाचन अधिकृत जयप्रकाश काफ्लेले बताए ।

३२ वटा वडामा स्थापना गरिएको १ सय ४३ वटा मतदान केन्द्रबाट लगभग ७५ प्रतिशत मत खसेको काफ्लेको अनुमान छ । १ सय ४३ वटै मतदान केन्द्रबाट मतपेटिका संकलन गरेर आजै मतगणना स्थल वीरगञ्ज महानगरपालिका वडा नम्बर १४ पिपरास्थित श्री नृसिंह माविको भवनमा लिएपछि मतगणना शुरु हुने काफ्लेले बताए ।

२०७४ सालको स्थानीय तह निर्वाचनमा वीरगञ्जको ठाकुुरराम बहुमुखी क्याम्पसमा मतगणना गरिएको थियो । मतगणना गरिने कोठाहरुमा ८ फिट अग्लो तारजाली सहितको बार लगाइएको छ । मतगणना हुने र मतपेटिका भण्डारण गर्ने सबै कोठाहरुमा सिसिटिभी क्यामेरा जडान गरिएको छ । ४ वटा कोठामा मत गणना गर्ने र ५ वटा कोठामा मतपेटिका भण्डारण गर्ने गरि तयारी गरिएको मुख्य निर्वाचन अधिकृत पौडेलले जानकारी दिए ।