वीरगञ्जमा देखियो बर्डफ्लू, १९ सय कुखुरा नष्ट

वीरगञ्ज, २७ फागुन । पर्साको वीरगञ्जस्थित एउटा कुखुरा फर्ममा बर्डफ्लू देखिएको छ । पर्साका प्रहरी नायव उपरीक्षक (डिएसपी) ओमप्रकाश खनालका अनुसार वीरगञ्ज महानगरपालिका १५ भेडीयाहीमा सञ्चालित एउटा कुखुरा फर्मका कुखुराहरुमा बर्डफ्लू देखीएको हो ।
स्थानीय सागिर अन्सारीले सञ्चालन गरेको उक्त कुखुरा फर्ममा रहेका १९ सय वटा कुखुरा बर्डफ्लू संक्रमणका कारण मरेको डिएसपी खनालले जानकारी दिए ।
ठूलो संख्याका कुखुराहरुमा बर्डफ्लू देखिएपछि फर्ममा रहेका अरु कुखुरा र अन्य बस्तुहरुलाई समेत नष्ट गरिएको छ ।
पर्सा प्रहरीका प्रवक्तासमेत रहेका डिएसपी खनालका अनुसार जिल्ला पशु क्वारेन्टाइन कार्यालय पर्साबाट पशु डाक्टर हरेराम यादवको नेतृत्वमा फर्ममा रहेका जीउँदो ३० वटा कुखुरा, २ हजार पिस अण्डा, ३ सय केजी दाना, ३ हजार थान अण्डाको खाली क्रेट र बर्ड फ्लूका कारण आफै मरेका १९ सय वटा कुखुरा खाल्डोमा पुरेर नष्ट गरिएको छ ।
कुखुराहरु नष्ट गरेपछि फर्मलाई सिल गरिएको छ । सो स्थानमा रहेका अन्य कुखुरा फर्महरुको पनि अनुगमन र परिक्षण गर्ने तयारी भइरहेको बताइएको छ ।