वीरगञ्ज, ११ कार्तिक । पर्साको धोबिनी गाउँपालिका २ भिखमपुर प्राथमिक स्वास्थ्य केन्द्रमा प्रसुती गराउँदा प्राप्तहुने यातायातखर्च नपाएको समाचार प्रकाशमा आएको छ । स्वास्थ्य केन्द्रमा प्रसुती गराउँदा नेपाल सरकारबाट पाउने यातायातखर्च नपाएको सुत्केरी महिलाहरुले गुनासो गरेका छन् ।
धोबिनी गाउँपालिका र वडा अध्यक्षको चरम लापरवाहीका कारण यातायातखर्च नपाएको महिलाहरुको आरोप छ । गत आर्थीक वर्ष २०७७÷७८ को असारसम्ममा प्राथमिक स्वास्थ्य केन्द्र भिखमपुरको वर्थिंग सेन्टरमा ९३ जना महिलाहरुले सुरक्षित प्रसुती गराएको स्वास्थ्य केन्द्रको तथ्यांकमा उल्लेख छ ।
नेपाल सरकारको नियमानुसार ९३ जनालाई यातायात खर्चवापत १ हजार र स्वास्थ्य संस्थामा ४ पटक चेकजाँच गराएको २ सयका दरले ८ सय रुपैयाँ दिने व्यवस्था रहेको छ ।
तर पालिका र वडाको लापर्वाहीले महिलाहरुले रकम हालसम्मपनि नपाएको गुनासो छ । चालु आर्थीक वर्ष २०७८÷७९ को साउनदेखि असोजसम्म ६५ जना महिलाहरुले प्रसुती गराएको स्वास्थ्य केन्द्रको बर्थिंग सेन्टरमा कार्यरत स्टाप नर्स प्रिया महासेठले जानकारी दिइन् ।
गाउँ पालिकाले रकम पठाइसकेको भएपनि स्वास्थ्य केन्द्रको नाममा बैंक खाता खोल्न नसक्दा समस्या भएको स्वास्थ्य केन्द्र भिखमपुरका प्रमुख मनोज कुमार साहले जानकारी दिए ।
वडा अध्यक्ष र गाउँ पालिकाका स्वास्थ्यशाखा संयोजक नन्दलाल कुर्मीले खाताखोल्न कुनै चासो नदेखाएको उनको भनाई छ । गत आर्थीक वर्षमा बर्थिंग सेन्टरमा प्रसुती गराएबापत १ लाख ८७ हजार रकम आएपनि दिन सकिएको छैन ।
