गमक पोष्ट समाचारदाता / सिरहा, २६ साउन । सिरहाका एक निजी विद्यालयका प्रिन्सिपलले शुल्क तिर्न ढिलागरेको भन्दै अभिभावकमाथि नै कुटपिछ गरेका छन् । समयमै विद्यालयको शुल्क नतिरेकाले घरमैमा शुल्क उठाउन पुगेका मिर्चैया नगरपालिका १० मिथिलेश्वरमा रहेको रादजेवी इङ्गलिस बोर्डिङ स्कुलका प्रिन्सिपल रामकुमार साहले स्थानीय अशोक साह र उनका परिवारका सदस्यमाथि कुटपिट गरेका हुन् ।
विद्यालयमा पढ्दैगरेका अशोकका कान्छो छोरा नवीन कुमारको फिस वापतको रकम लिन घरै पुगेकावेला अहिले छैन पछि दिउँला भन्दा भएको विवादमा प्रिन्सिपल साहले अशोकमाथि कुटपीट गरेको जनाएको छ । झगडा छुट्याउन गएका उनकी श्रीमती सुनितादेवि साह, जेठी छोरी सरिता साह, माइँली छोरी अञ्जली साह माथि पनि कुटपीट गरेको छ ।
जसमध्ये अशोक र उनकी जेठि छोरी सरिता गम्भीर छन् । अशोकको टाउकोमा चोट लागेको छ भने छोरी सरिताको हात भाँचिनुका साथै टाउको चोट लागेको छ । उनीहरू दुवैलाई स्थानीयस्तरमा उपचार हुन नसकेपछि थप उपचारको लागि विराटनगर रिफर गरिएको छ । अन्यको भने यहीँ उपचार भइरहेको छ ।
लकडाउनले गर्दा व्यापार राम्रो चलेको छैन त्यसैले ढिलो भएको हो अव चाँडै दिन्छु भन्दाभन्दै आफूमाथि अपशब्द प्रयोगगर्दै कुटपीट गरेको अशोकले बताए । उनले स्थानीय बजारमा पान पसल चलाउँदै आएका छन् । परिवारजनका अनुसार विद्यालयको ५–६ हजार शुल्क तिर्न बाँकी रहेको छ ।
घटनालगतै प्रिन्सिपल साह फरार रहेको प्रहरीले बताएको छ । प्रहरीले घटनाबारे अनुसन्धान भईरहेको र खोजीकार्य जारी रहेको इलाका प्रहरी कार्यालय मिर्चैयाका डिएसपि राजेन्द्र श्रेष्ठले बताए ।
