गमक पोष्ट समाचारदाता / लहान, १९ जेष्ठ । औषधिको व्यापारबाट राम्रो आम्दानी हुने भएपछि सिरहा सदरमुकामका साथै गाउँका सा–साना स्थानीय बजारहरूमा समेत धमाधम अवैध औषधि पसल खुलेका छन् । औषधि व्यवस्था विभागबाट नियमित अनुगमन नहुँदा त्यस्ता नयाँ औषधि पसल खुल्दै गएका हुन् ।
जिल्लाको दक्षिणी तथा पश्चिमी क्षेत्रमा दिनानुदिन च्याउ उम्रिए झैँ निजी क्लिनिक तथा औषधि पसल खोलिँदै आएपछि यहाँका ग्रामीण क्षेत्रका बासिन्दा ठगिएका छन् । जिल्लाका धेरैजसो क्षेत्रमा अनधिकृतरूपमा क्लिनिक तथा औषधि पसल खुल्लमखुल्ला सञ्चालन भइरहे पनि यसलाई रोक्न औषधि व्यवस्था विभाग, जिल्ला प्रशाासन, जिल्ला बजार अनुगमन समिति र क्षेत्रीय स्वास्थ्य निर्देशनालयले समेत बेवास्ता गरेपछि अवैध औषधि पसल खुल्दै गएका हुन् ।
जिल्लामा कतिवटा अवैध औषधि पसल छन् यसको तथ्याङ्क कसैसँग छैन । बजार अनुगमन गर्न आफूसंँग स्रोत र साधनको अभाव भएकाले समस्या परेको औषधि व्यवस्थापन कार्यालय सिरहाले जनाएको छ । सदरमुकाम सिरहा र सहरी क्षेत्रमा मात्रै नभई अहिले गाउँगाउँमा समेत यस्ता औषधि पसलहरू खुल्दै गएकाले औषधिको जथाभावी व्यापार बढेको हो । ग्रामीण क्षेत्रका उपभोक्ता रोग बताको भरमा पसलबाट औषधि लगेर जोखिम मोलिरहेका छन् भने कतिपय औषधि पसलले सामान्य अनुभवकै भरमा औषधिको व्यापार गर्ने गरेका छन् ।
कतिपय औषधि व्यापारीले विभिन्न अस्पतालका चिकित्सकको नाम झुन्ड्याएर आफैँले स्वास्थ्य जाँच गर्ने गर्दा पनि सम्बन्धित निकायले चासो नदिएको कुशहाका स्थानियवासी सत्य नारायण चौधरीले बताए । नियमानुसार औषधि पसल राख्न कम्तीमा तीनवर्षे फार्मेसी पास गर्नुपर्ने भए पनि यहाँका तिन दर्जन यस्ता पसलेले सामान्य अनुभव बटुलेकै भरमा औषधिको व्यापार गरेका छन् ।
