गमक पोष्ट समाचारदाता / सिरहा, १ जेष्ठ । नेपाल प्रहरीको सक्रियतामा जिल्लाको विभिन्न निजी उद्योगहरुबाट अक्सिजन सिलिन्डर सङ्कलन गरेको छ । कोभिड १९ का कारण देशभर अक्सिजन सिलिण्डहरुको अभाव भईरहेका बेला आज ईलाका प्रहरी कार्यालय मिर्चैयाले मिर्चैया नपा १ मा रहेको सूर्या सिमेन्ट उद्योगबाट ३० थान र कर्जन्हा नपा ४ बन्दिपुरमा रहेको प्रशान्त वालुवा प्रशाधन क्रसर उद्योगबाट ३ थान सहित ३३ थान सिलिण्डर सङ्कलन गरेको हो ।
सङ्कलित सिलिण्डर डीसीसीएमसी सिरहाको निर्णय बमोजिम स्वास्थ्यकार्यालय सिरहाको पत्रानुसार अक्सिजन रिफिल गरी आवश्यकता अनुसार परिचालन गर्न रेडक्रस सोसाइटी सिरहा शाखाको जिम्मा लगाइएको इकाला प्रहरी कार्यालय मिर्चैयाका प्रमुख डिएसपी राजेन्द्र श्रेष्ठले जानकारी दिए ।
अहिले देशभर अक्सिजन सिलिण्डरको अभाव देखिएको छ । जसका कारण कोरोना सङ्क्रमितहरुले ज्यान समेत गुमाउनुपर्ने अवस्था रहेको छ ।
