गमक पोष्ट समाचारदाता / सप्तरी, २७ बैशाख । सप्तरीमा साइकलमा सवार दम्पतीको ट्रकको ठक्कर मृत्यु भएको छ । सप्तरीको हनुमाननगर कंकालिनी नगरपालिका १ भारदह भलुवाका ५० वर्षीय सत्यनारायण मण्डल र उहाँकी ४५ वर्षीया श्रीमती सुनिता देवी मण्डल सवार साइकललाई ना ६ ख ३८६१ नम्बरको मालवाहक ट्रकले ठक्कर दिँदा मृत्यु भएको हो ।
पूर्व–पश्चिम राजमार्गअन्तर्गत हुनमाननगर कंकालिनी नगरपालिका १ को सडक खण्डमा अनियन्त्रित भएर ट्रकले मण्डल दम्पती सवार साइकललाई ठक्कर दिएको इलाका प्रहरी कार्यालय कञ्चनपुरका प्रमुख डीएसपी नरेश सिंहले जानकारी दिए । उनका अनुसार ट्रकको ठक्करबाट मण्डल दम्पतीको घटनास्थलमै ज्यान गएको हो ।
दुवै शव पोस्टमार्टमको लागि गजेन्द्रनारायण सिंह अस्पताल राजविराजमा राखिएको छ । ठक्कर दिने ट्रक र चालक प्रहरीको नियन्त्रणमा रहेको छ ।
