सुदिप राउत
सिरहा, २९ चैत। नयाँ वर्षको अवसर पारेर प्रत्येक वर्ष वैशाख १ गते आयोजना हुने लहानस्थित ऐतिहासिक तथा धार्मिक पर्यटकीय स्थल सलहेश फूलबारी मेलामा भारतीय श्रद्धालुहरूको आगमन सुरु भएको छ। मेला सुरु हुनुभन्दा दुई दिनअगावै भक्तजनहरूको चहलपहल बढ्न थालेको हो।
लहान नगरपालिका १२ र २२ मा अवस्थित सलहेश फूलबारीमा नयाँ वर्षको दिन मात्र फुल्ने विश्वास गरिने माला आकारको सुनाखरी फूल अवलोकन गर्न तथा पूजाअर्चना गर्न नेपाल र भारतका विभिन्न स्थानबाट हजारौँ श्रद्धालुहरू आउने गर्छन्।
मेला व्यवस्थापन समितिका अध्यक्ष दशमी लाल चौधरीका अनुसार मन्दिर अगाडि रहेको हारमको रुखमा यस वर्ष पनि सुनाखरी फूल फुल्न सुरु गरेको छ। तर, फक्रिन बाँकी रहेको छ। करिब नौ बिघा क्षेत्रफलमा फैलिएको फूलबारी क्षेत्रमा अहिले नै भक्तजनहरू आउने क्रम जारी रहेको उनले जानकारी दिए।
श्रद्धालुहरू दिनरात फूलबारी परिसरका रुखमुनि पाल टाँगेर बस्न थालेका छन्। बढ्दो पर्यटकको संख्यासँगै यहाँ पूर्वाधारको अभाव खड्किएको छ। स्थानीय विरेन्द्र चौधरीले श्रद्धालु भक्तजनका लागि व्यवस्थित धर्मशालाको अभाव रहेको गुनासो गरे।
लोकगाथा अनुसार महिषोथा (सिरहा)मा जन्मिएका लोकनायक राजा सलहेशको प्रेमस्थलको रूपमा यस फूलबारीलाई लिइन्छ। राजा सलहेश र उनको प्रेमिका मालिनीको प्रेमको प्रतीकका रूपमा सुनाखरी फूललाई मानिन्छ।
१४औँ शताब्दीका लोकनायक राजा सलहेशको वीरता, साहस र प्रेमसँग सम्बन्धित गाथाको स्मरणमा हरेक वर्ष वैशाख १ गते यहाँ मेला आयोजना गरिन्छ। तराई क्षेत्रमा पासवान समुदायका इष्टदेव मानिने सलहेशको पूजा गर्दा सन्तान प्राप्ति तथा विभिन्न रोगबाट मुक्ति पाइने जनविश्वास रहेको छ।
सरकारले यस क्षेत्रलाई नयाँ पर्यटकीय गन्तव्यको सूचीमा समावेश गरे पनि ठोस विकास हुन नसकेको सरोकारवालाहरू बताउँछन्। जिल्ला उद्योग वाणिज्य संघ सिरहा, लहानका अध्यक्ष प्रदीप कुमार गुप्ताले तीनै तहका सरकार तथा सरोकारवाला निकायले एकीकृत गुरुयोजना बनाएर काम गर्न सके यस क्षेत्रलाई अझ आकर्षक धार्मिक पर्यटकीय केन्द्र बनाउन सकिने बताए।
