काठमाडौं, १२ फागुन। सरकारले आउँदो फागुन २१ गते हुने प्रतिनिधिसभा सदस्य निर्वाचनमा तीन दिन सार्वजनिक बिदा दिने भएको छ। सिंहदरबारमा आज बसेको मन्त्रिपरिषद् बैठकले फागुन २०, २१ र २२ गते सार्वजनिक बिदा दिने निर्णय गरेको हो।
निर्वाचन आयोगको सिफारिसअनुसार सरकारले तीन दिन बिदा दिने निर्णय गरेको सरकारका प्रवक्ता एवम् गृहमन्त्री ओमप्रकाश अर्यालले जानकारी दिए। यस्तै सरकारले जेन–जी परिषद् गठन गर्ने भएको छ। मन्त्रीपरिषद बैठकले यो निर्णय गरेको हो। नवयुवा आन्दोलनको बलमा गठन भएको वर्तमान सरकारमाथि उनीहरुको माँग सम्बोधनका लागि उपयुक्त निर्णय गर्न नसकेको भन्दै आलोचना हुँदै आएको छ।
यस्तै मन्त्रिपरिषद् बैठकले चीन सरकारले दिने ४० लाख अमेरिकी डलरबराबरको नगद अनुदान स्वीकार गर्ने, बुढीगण्डकी जलाशययुक्त जलविद्युत् आयोजनाको वित्तीय लगानी ढाँचा स्वीकृत गर्ने, बीमा ऐन २०७९ को दफा १४० बमोजिमको कसुर सम्बन्धी मुद्दाको कारबाही र किनारा गर्ने अधिकार जिल्ला अदालतलाई तोक्ने निर्णय गरेको छ।
