काठमाडौ., १५ मंसिर। मधेस प्रदेशका मुख्यमन्त्री सरोजकुमार यादवलाई २४ घण्टाभित्र विश्वासको मत लिन लगाउन प्रदेश प्रमुखको नाममा सर्वोच्च अदालतले परमादेश जारी गरेको छ। ३ दिनको सुनुवाइ गरेपछि सर्वोच्च अदालतका न्यायाधीश हरिप्रसाद फुयाल र नित्यानन्द पाण्डेको इजलासले २४ घण्टाभित्र विश्वासको मत लिन लगाउन प्रदेश प्रमुखको नाममा परमादेश जारी गरेको हो।
यदि यादवले विश्वासको मत नपाए यसअघि नै प्रदेश सभाका ७३ जना सदस्यले संविधानको धारा १६८ (२) बमोजिमको सरकार गठन प्रक्रिया अगाडि बढाउन आदेश दिइएको छ।
रिट निवेदकले यादवलाई मुख्यमन्त्रीबाट बर्खास्त गर्न माग गरे पनि विश्वासको मतको प्रस्तावबाट नै मुख्यमन्त्री रहने वा नरहने निरुपण हुनुनै संसदीय लोकतन्त्रको मूल्यमान्यता अनुरुप हुने सर्वोच्चले ठहर गरेको छ। यसअघि सर्वोच्चले मंसिर २ गते यादवलाई दीर्घकालीन महत्त्वका निर्णय नगर्ने अन्तरिम आदेश दिएको थियो।
अब सर्वोच्चको आदेश बमोजिम मुख्यमन्त्री यादवले विश्वासको मत लिने प्रस्ताव प्रदेशसभामा पेश गर्नुपर्नेछ ।
तत्कालीन जितेन्द्रप्रसाद सोनालले कात्तिक २२ गते पदबाट राजीनामा दिएका थिए। त्यसको भोलिपल्टै तत्कालीन प्रदेश प्रमुख सुमीत्रा सुवेदी भण्डारीले बर्दीवासको एक होटलमा यादवलाई रातको समयमा मुख्यमन्त्रीमा शपथ गराएकी थिइन्।
एमालेबाहेकका दलहरूले धारा १६८(२) बमोजिम सरकार गठनका लागि छलफल गरिरहँदा भण्डारीले ठूलो दलको संसदीय दलको नेताको हैसियतमा यादवलाई १६८ (३) अनुसार मुख्यमन्त्री नियुक्त गरेकी थिइन्।
