सिरहा, १३ मंसिर। विद्यालयको पठनपाठन प्रभावित हुनेगरी गोलबजार ११ स्थित जनता माध्यमिक विद्यालय बलकावामा एक गैरसरकारी संस्थाले आफ्नो कार्यक्रम गरेको पाइएको छ। हेल्पिङ हर्ट नेपाल नामक गैरसरकारी संस्थाले विहिवार पूर्वस्वीकृतिविना विद्यालय समयमा विद्यालयको प्राङ्गणमा सार्वजनिक कार्यक्रमको आयोजना गरेको हो।
कक्षा सञ्चालन भइरहेको बेला विद्यालयै हाताभित्र अन्य कार्यक्रम चल्दा पठन पाठन प्रभावित भएको स्थानीय अभिभावक तथा स्थानीयले जानकारी दिए। उनले भने, ‘विद्यालय चलिरहेको वेला परिसरमै कार्यक्रम गर्दा पठन पाठन प्रभावित हुने निश्चित छ। विद्यालय समयमा विद्यालय परिसरमा स्वीकृति लिएर पनि कार्यक्रम गरिनु हुँदैन, स्वीकृति विना गरिएको रहेछ भने झन यो गैरकानूनि र मिचहा प्रवृति हो।’
विद्यालय व्यवस्थापन समितिका सदस्य बिजय यादवले आफूहरुलाई कार्यक्रमबारे कुनै जानकारी नभएको बताए। उनले भने, ‘व्यवस्थापन समितिको बैठकमा पनि निर्णय भएन। कस्को स्वीकृतिमा कार्यक्रम चलाइयो? यस्तो मनपरीले विद्यार्थीको पढाइ बिग्रन्छ।’
अनुगमन समितिका सदस्य पुनित कुमार यादवले थप्दै भने, ‘हेल्पिङ हर्ट नेपालले विद्यालय परिसरमा महिनौंदेखि निर्माण सामग्री ल्याएर कठघराहरू बनाइरहेका छन्। यसरी विद्यार्थीको ध्यान पढाइमा कसरी जाओस्? यो त सीधै पठन–पाठनमा हस्तक्षेप हो।’
अर्का स्थानीय बिजय भूषण यादव थप्छन, ‘विद्यालय अध्यक्ष जियाउद्दिन खानले कहिले कन्सर्ट, कहिले अन्य कार्यक्रम, गर्ने गरिरहेका छन्। यी कार्यले विद्यार्थीको भविष्यसँग खेलवाड़ भइरहेको छ। यस्ता गतिविधि तत्काल रोकिनु पर्छ।’
विद्यालयका प्रधानाध्यापक बेचन प्रसाद साहले विद्यालयले कार्यक्रम गर्ने कुनै अनुमति नदिएको बताए। उनले विद्यालय व्यवस्थापन समितिका अध्यक्ष नै कार्यक्रम सञ्चालक संस्थाका अध्यक्ष भएकाले मसँग अनुमति लिने नै कुरै भएन। कार्यक्रम गर्ने र अन्य संस्थाको काम विद्यालय परीसरमा गराउने कुनै लिखित मौखिक निर्णय नभएको उनले स्पष्ट गरे।
विद्यालय प्रशासनलाई अध्यक्षको निजी निर्णयले चलाइरहेको स्थानीय बताउँछन्।
विद्यालय व्यवस्थापन समितिका अध्यक्षसमेत रहेका हेल्पिङ हर्ट नेपालका अध्यक्ष जियाउद्दिन खानले भने कार्यक्रम अनुमति लिएरै गरेको दाबी गरे। तर पत्रकारले स्वीकृतिको कागज देखाउन आग्रह गर्दा उनले पछि देखाइदिन्छु भन्दै पन्छिए।
उनले अनुमिति लिएको दावी गरेपनि प्रधानाध्यापक र गोलबजार नगिपालिकाले विद्यालयमा कार्यक्रम गर्ने बारे कसैले कुनै अनुमति नलिएको बताए। नगरपालिकाका निमित्त प्रमुख प्रशाकीय अधिकृत योगेन्द्र कुमार सिंहले भने, ‘विहिवरको लागि विद्यालयमा कार्यक्रम गर्ने बारे कुनै संघ संस्थाले अनुमति लिएको छैन। अन्य दिनको विषयमा मलाई जानकारी भएन।’
विद्यालय परिसरमा बिना स्वीकृति कार्यक्रम सञ्चालन गर्नु कानुन उल्लङ्घन मात्र होइन, विद्यालयको मर्यादा, अनुशासन र विद्यार्थीको शैक्षिक हकमाथिको अतिक्रमण भएको स्थानयिहरु बताउँछन्।
शिक्षा ऐन २०२८, शिक्षा नियमावली तथा विद्यालय संचालन निर्देशिकाले पनि पठन–पाठनको समयमा बिद्यालय भवन, कक्षाकोठा र परिसर कुनैपनि गैरसरकारी संघ संस्थाले प्रयोग गर्न नपाइने प्रष्ट भनिएको छ।
प्रयोग गर्दा स्थानिय तह, शिक्षा कार्यालय लगायतका सम्बन्धित निकायबाट अनुमती लिनुपर्ने प्रावधान छ। तर हेल्पिङ हर्ट नेपाल नामक संस्थाले यसको कुनै पालाना गरेको पाइएन्।
हेल्पिङ हर्ट नेपालले अन्तर्राष्ट्रिय मानवीय सहायता संगठन नेदरल्याण्डको सहयोगमा मोवाईल मार्केट स्टल प्रोजेक्ट मार्फत स्थानीय न्यून आय भएका व्यसायीहरुलाई ठेला वितरण कार्यक्रमको आयोजना गरेको थियो।
