रौतहट २१ चैत। रौतहट स्थित बँदेल मार्न राखिएको बिद्युतिय धरापमा परेर एकजना महिलाको मृत्यु भएको छ।
मृतक महिलाको शव लुकाएको अभियोगमा प्रहरीले तीन जनालाई नियन्त्रणमा लिएको छ।
जिल्लाको उत्तर पूर्वीभेग वृन्दावन नगरपालिका १ बलेरी गाउँ छेउमा बँदेल मार्न थापीएको बिद्युतिय पासोमा करेन्ट लागेर महिलाको मृत्यु भएपछी शव लुकाउने ३ जनालाई प्रहरीले पक्राउ गरेको हो। करेन्ट लागेर स्थानिय रूपनारायण राउतकी श्रीमती ५५ वर्षीया देवी पटेलको एकसाता अघि मृत्यु भएको जिल्ला प्रहरी रौतहटका प्रमुख एसपी दिलीप घिमिरेले जानकारी दिए।
करेन्ट लागेर महिलाको मृत्यु भएपछि पासो थाप्नेहरुले घटना लुकाउन नजिकै जङ्गलमा खाल्डो खनी शव पुरेका थिए। घटना पछी महिला बेपत्ता भएको पीडित परिवारमार्फत जानकारी भएपछि प्रहरीले अनुसन्धान थालेको थियो।
