बारा, २० चैत। जीतपुरसिमरा गोल्डकपको १५ औं संस्करण आगामी शुक्रबारबाट सिमरा रङ्गशालामा सञ्चालन हुने भएको छ। नव–जनजागृति युवा क्लबको आयोजना र जीतपुरसिमरा उपमहानगरपालिकाको मुख्य सहयोगमा प्रतियोगिता आयोजना हुन लागेको हो।
आयोजक क्लबका अध्यक्ष रामचन्द्र लामाका अनुसार सिमरा रङ्गशालाको फ्लड लाईटमा आयोजना हुने प्रतियोगितामा ८ टिम सहभागि हुनेछन्। प्रतियोगिताको विजेताले १० लाख तथा उपविजेताले ५ लाख रुपैयाँ सहित ट्रफि प्रदान गरिने जनाएको छ।
प्रतियोगिताको सर्वोत्कृष्ट खेलाडीले एकथान इलेक्ट्रिक स्कुटर प्राप्त गर्नेछन् भने उत्कृष्ट प्रशिक्षक, उत्कृष्ट गोलरक्षक र उच्च गोलकर्ताले समान २५ हजार तथा इमर्जिङ प्लेयरले १५ हजार सहित ट्रफि प्राप्त गर्नेछन्। प्रत्येक खेलका म्यान अफ दि म्याचले १० हजार नगद सहित ट्रफि प्राप्त गर्नेछन्।
प्रतियोगितामा साविक विजेता नेपाल पुलिस क्लब, मच्छिन्द्र फुटबल क्लब, फ्रेण्ड्स क्लब, हिमालयन शेर्पा क्लब, भरतपुर फुटबल क्लब चितवन, सलहेश युवा क्लब सिराहा, मकवानपुर जिल्ला फुटबल संघ हेटौंडा र आयोजक नवजनजागृति युवा क्लब सिमराको सहभागिता रहनेछ।
क्लबको आर्थिक अवस्था तथा ए डिभीजन क्लबहरुको वर्तमान अवस्थाका कारण सहभागि टिमको संख्या घटाईएको क्लबले जनाएको छ। यस अघिका संस्करणहरुमा कम्तिमा १० टिमको सहभागिता रहने गरेको थियो।
पत्रकार सम्मेलनमा क्लबका अध्यक्ष रामचन्द्र लामा, उपाध्यक्ष राजदास श्रेष्ठ, शंकर थापा, महासचिव शम्भुसिंह ठकुरीसहित क्लबका पदाधिकारीहरुको उपस्थिती रहेको थियो।
