ताप्लेजुङ, १९ चैत। ताप्लेजुङमा जङ्गलमा लागेको डढेलो निभाउने क्रममा दुई जनाको जलेर मृत्यु भएको छ। छुट्टाछुट्टै डढेलोको घटनामा दुई साताको अवधिमा उनीहरुको मृत्यु भएको हो।
प्रहरीका अनुसार जिल्लाको मेरिङ्देन गाउँपालिका १ थिङ्लाबुमा एक युवक र आठराई त्रिवेणी गाउँपालिका २ फूलबारीमा वृद्धको मृत्यु भएको भएको हो। थिङ्लाबुस्थित लुङ्जा भीरमा लागेको डढेलो निभाउने क्रममा पाथीभरा याङ्वरक गाउँपालिका ६ थुम्बेदिन स्थायी ठेगाना भएका २७ वर्षीय भूपेन्द्र ल्वागुनको मृत्यु भएको हो।
डढेलो निभाउने क्रममा एक्कासि आगोको ज्वालाले भेटेको र ल्वागुनको जलेर मृत्यु भएको ताप्लेजुङका प्रहरी प्रमुख डीएसपी रवि रावलले जानकारी दिए। डीएसपी रावलका अनुसार रावलका डढेलो निभाउने क्रममै निघुरादिनका ७५ वर्षीय सुरेन्द्र तामाङको मृत्यु भएको हो। आगोको लप्काले भेटेपछि भाग्ने क्रममा लडेर तामाङको मृत्यु भएको जिल्ला प्रहरी कार्यालयले जानकारी दिएको छ।