सिरहा, १७ फागुन। नेकपा (माओवादी केन्द्र)का अध्यक्ष एवम् पूर्वप्रधानमन्त्री पुष्पकमल दाहाल ‘प्रचण्ड’ले रिङ्कु सदायलाई न्याय दिलाउन पार्टी निरन्तर लड्ने बताएका छन्। जनतासँग माओवादी तराई–मधेस हुलाकी जन–जागरण अभियान अन्तर्गत सिरहा आईपुगेका अध्यक्ष प्रचण्डले सदायको घर नवराजपुर गाउँपालिका १ भगवतीपुर पुगेर पीडितको पक्षमा न्यायको लागि निरन्तर आवाज उठाउने बताएका हुन्।
अध्यक्ष प्रचण्डले घटनाको निस्पक्ष छानबिन गरी दोषीलाई कडा कारबाही गराउन सरकारलाई दवाव दिइरहेको स्पष्ट पारे। उनले भने, ‘पीडितहरुले न्याय पाउनुपर्यो भनेर हम्रो पार्टीले राष्ट्रिय सभामा आवाज उठाएर देशभरी यो घटनालाई स्थापीत गराउने काम भएको छ। र, हामी अहिले तराईमधेशका जनतामाथि भईरहेको विभेद, अन्याय अत्याचारका विरुद्ध आवाज उठाउनका लागि नै हाम्रो पार्टीका नेताहरुको सिङ्गो टिम तराई मधेशको अभियानमा छ। पीडित परिवारसँग भेट्ने, उनीहरुको चहर्याएको घाउमा मलप पट्टी लगाउने र यो घटनालाई निश्पक्ष छानविनको निम्ति सरकारलाई र प्रशासनलाई दवावदिने उदेश्यले हामी सिङ्गो टीम रिङ्कु कुमारी सायको घरमा आएका छौं।’
‘हाम्रो मुख्य उदेश्य भनेको नै पीडित परीवारले न्याय पाउनु पर्यो र आपराधिहरुलाई कार्वहीको दायरामा ल्याउने पर्यो भन्ने हो; दहालले भने।
उनले यो देशमा हिजोपनि सामन्ती राज्यले दलितलाई, गरिव, महिलाहरुमाथि विभेद गर्दै आएको इतिहास रहेको बताए। उनले भने, ‘विभेद र अत्याचारको विरुद्ध हिजो विद्रोह भयो, आन्दोलन पनि भयो। अहिले संविधानले केही अधिकार दिएकोपनि छ। तर, सरकारले जुन गम्भिरताका साथ यस्ता आपराधिक घटनाबारे छानविन गर्नु पनुे हो, जति निश्पक्ष हुनुपर्ने हो, त्यति निश्पक्ष अझै हुन सकेको छैन।’
सोही क्रममा मुसहर समुदाय सिरहाले घटनाको छानविन गरि दोषीलाई कडा कार्वाहीको माँग गर्दै अध्यक्ष प्रचण्डलाई ज्ञापनपत्र बुझाएको छ।
सदायको गत माघ ३० गते आफ्नै घरमा संकास्पदरुपमा मृत्यु भएको थियो। दुई दिनअघि उनीमाथि सामुहिक बलात्कार पञ्चायतिमार्फत मिलाउन खोजेपछि घटना सार्वजनिक भएको थियो। दोस्रो पटकको छलफलमा उनका आमा गएर फकर्दा उनी घरमा मृत अवस्थामा थिए।
